രാജസ്ഥാനിലെ നിംലിയിൽ നടന്ന അനിൽ അഗർവാൾ ഡയലോഗ് 2026-ന്റെ ഒരു സെഷനിൽ സംസാരിക്കവെ, പ്രാദേശികമായ പ്രീബയോട്ടിക് ഭക്ഷണക്രമങ്ങൾ (prebiotic diets) കുട്ടികൾക്കും ഗർഭിണികൾക്കും വലിയൊരു അനുഗ്രഹമായി മാറുമെന്ന് ഭുവനേശ്വർ എയിംസിലെ (AIIMS) രാമദാസ് ബാലമുരുകൻ പറഞ്ഞു. 2026 ഫെബ്രുവരി 27-നായിരുന്നു അദ്ദേഹത്തിന്റെ പ്രഭാഷണം.
ഡിസ്ബയോസിസ് (dysbiosis - ദഹനവ്യവസ്ഥയിലെ ബാക്ടീരിയകളുടെ അസന്തുലിതാവസ്ഥ മൂലം ആരോഗ്യപ്രശ്നങ്ങൾ ഉണ്ടാകുന്ന അവസ്ഥ) സംബന്ധിച്ച പഠനങ്ങൾ നടത്തുന്ന ബാലമുരുകൻ, മൂന്ന് ദിവസം നീണ്ടുനിന്ന പരിപാടിയുടെ അവസാന ദിനത്തിൽ വീഡിയോ കോൺഫറൻസിംഗിലൂടെയാണ് സംസാരിച്ചത്.
പ്രീബയോട്ടിക്സ് (ദഹനത്തെ സഹായിക്കുന്ന ബാക്ടീരിയകളുടെ വളർച്ചയെ പ്രോത്സാഹിപ്പിക്കുന്ന ഭക്ഷണ ഘടകങ്ങൾ), ഫെർമെന്റഡ് ഭക്ഷണങ്ങൾ (microbial പ്രക്രിയയിലൂടെ ഗുണകരമായ ബാക്ടീരിയകളെ വർദ്ധിപ്പിച്ച ആഹാരങ്ങൾ) എന്നിവ ഉൾപ്പെടുന്ന ഭക്ഷണക്രമം കുടലിലെ ബാക്ടീരിയകളെ സന്തുലിതമാക്കുമെന്നും ഇത് പോഷകാഹാരക്കുറവ് പരിഹരിക്കാൻ സഹായിക്കുമെന്നും ബാലമുരുകൻ അഭിപ്രായപ്പെട്ടു.
മണ്ണ് ജീവശാസ്ത്രത്തിലെ (soil biology) ഗവേഷണങ്ങളിൽ നിന്നാണ് കുടലിലെ ബാക്ടീരിയകളെ മെച്ചപ്പെടുത്തുക എന്ന ആശയം തനിക്ക് ലഭിച്ചതെന്ന് അദ്ദേഹം പറഞ്ഞു. അനീമിയ (രക്തത്തിലെ ഹീമോഗ്ലോബിന്റെ അളവ് കുറയുന്ന അവസ്ഥ), മൈക്രോബയോം (ശരീരത്തിനുള്ളിലെ സൂക്ഷ്മജീവികളുടെ കൂട്ടം) എന്നിവയിൽ പ്രവർത്തിച്ചു തുടങ്ങിയപ്പോൾ, ഫലപ്രദമായ പരിഹാരങ്ങൾ രൂപകൽപ്പന ചെയ്യുന്നതിനായി പോഷകാഹാരക്കുറവിന്റെ ജീവശാസ്ത്രം മനസ്സിലാക്കുന്നതിലായിരുന്നു അദ്ദേഹത്തിന്റെ ശ്രദ്ധ.
ഗ്രാമപ്രദേശങ്ങളിലെയും ഗോത്രവർഗക്കാരിലെയും സൂക്ഷ്മജീവികളുടെ രീതികൾ നഗരങ്ങളിലുള്ളവരിൽ നിന്ന് തികച്ചും വ്യത്യസ്തമാണെന്ന് അദ്ദേഹവും സംഘവും നിരീക്ഷിച്ചു. വിളർച്ചയുള്ളവരിൽ ലാക്ടോബാസിലസ് (ദഹനത്തെയും രോഗപ്രതിരോധ ശേഷിയെയും സഹായിക്കുന്ന ബാക്ടീരിയ) കുറവാണെന്നും മറ്റ് സഹായികളായ ബാക്ടീരിയകളിൽ അസന്തുലിതാവസ്ഥയുണ്ടെന്നും കണ്ടെത്തി. അതേസമയം, സെഗ്മെന്റഡ് ഫിലമെന്റസ് ബാക്ടീരിയയുടെ (SFB) അളവ് ഇവരില് കൂടുതലായിരുന്നു. വീക്കത്തിനും (inflammation) രോഗപ്രതിരോധ പ്രതികരണങ്ങൾക്കും കാരണമാകുന്ന SFB, ശരീരത്തിലേക്കുള്ള ഇരുമ്പിന്റെ ആഗിരണത്തെ (iron absorption) തടസ്സപ്പെടുത്തുന്നു.
ഗവേഷണത്തിന്റെ ഭാഗമായി ഗർഭിണികൾക്ക് 180 ദിവസത്തേക്ക് ദിവസവും 60 മില്ലിഗ്രാം ഇരുമ്പ് (iron) നൽകി. ഇതിൽ 10 ശതമാനം മാത്രമേ ശരീരം ആഗിരണം ചെയ്യുന്നുള്ളൂ എന്ന് ഗവേഷകർ കണ്ടെത്തി. ബാക്കി ഭാഗം വൻകുടലിലെത്തുകയും അവിടെ ചില ബാക്ടീരിയകളുടെ വളർച്ചയെ പ്രോത്സാഹിപ്പിക്കുകയും ചെയ്യുന്നു. കൂടാതെ 'എന്ററോസൈറ്റ് അയൺ ട്രാപ്പ്' (ഇരുമ്പ് രക്തചംക്രമണത്തിലേക്ക് കടക്കുന്നതിന് പകരം കുടലിലെ കോശങ്ങളിൽ തന്നെ കുടുങ്ങിക്കിടക്കുന്ന അവസ്ഥ) കാരണം ഇത് ശരീരത്തിന് പ്രയോജനപ്പെടുന്നില്ല. വെറുതെ ഇരുമ്പ് സപ്ലിമെന്റുകൾ നൽകുന്നത് എന്തുകൊണ്ട് അനീമിയ പരിഹരിക്കുന്നില്ല എന്ന് ഇത് വ്യക്തമാക്കുന്നു. അതിനാൽ, പ്രാദേശിക പ്രീബയോട്ടിക്സുകൾ നൽകുന്ന തന്ത്രമാണ് ഗവേഷകർ സ്വീകരിച്ചത്.
കുട്ടികൾക്കായി പ്രീബയോട്ടിക് ചോക്ലേറ്റ് ചിപ്പ് കുക്കികളും ഗർഭിണികൾക്കായി പ്രാദേശികമായ "യോഗ് ബനാന ഷെയ്ക്കും" പുളിപ്പിച്ച കഞ്ഞിവെള്ളവുമാണ് (fermented rice water) നൽകിയത്.
ഈ നടപടികൾ കുട്ടികളിലെ ധാതുക്കളുടെ ആഗിരണം മെച്ചപ്പെടുത്തുകയും കുടലിന്റെ ആരോഗ്യത്തെയും പ്രതിരോധശേഷിയെയും സഹായിക്കുന്ന ഷോർട്ട് ചെയിൻ ഫാറ്റി ആസിഡുകൾ വർദ്ധിപ്പിക്കുകയും ചെയ്തു. ഗുണകരമായ ബാക്ടീരിയകളുടെ സന്തുലിതാവസ്ഥ വീണ്ടെടുക്കപ്പെട്ടു. ശ്രദ്ധേയമായി, 'യോഗ് ബനാന ഷെയ്ക്കിന്റെ' ഉപയോഗം മലത്തിലെ സൂക്ഷ്മജീവികളും (stool microbes) മുലപ്പാലിലെ സൂക്ഷ്മജീവികളും (breast milk microbes) തമ്മിലുള്ള ഇടപെടൽ വർദ്ധിപ്പിച്ചു. എന്നാൽ ഇത് ലഭിക്കാത്ത കുട്ടികളിൽ ഇത്തരം ഗുണകരമായ മാറ്റങ്ങൾ കുറവാണെന്നും ദോഷകരമായ ബാക്ടീരിയകൾ കൂടുതലാണെന്നും കണ്ടെത്തി.
ഈ പഠനത്തോടൊപ്പം, ഇന്ത്യയിലെ ഭക്ഷണ വൈവിധ്യങ്ങൾ - മസാലകൾ, പുളിപ്പിച്ച ഭക്ഷണങ്ങൾ, ഉയർന്ന നാരുകളുള്ള ഭക്ഷണക്രമം എന്നിവ - കുടലിലെ സൂക്ഷ്മജീവികളുടെ അന്തരീക്ഷത്തെ സ്വാധീനിക്കുന്നുവെന്നും ഗവേഷകർ തെളിയിച്ചു. കൂടാതെ, കൃഷിയിടങ്ങളിലെ മണ്ണിന്റെ മൈക്രോബയോമിനെക്കുറിച്ചും ഗവേഷണം നടത്തി. നെല്ല്, തേയില തോട്ടങ്ങൾ എന്നിവയിൽ നടത്തിയ മൈക്രോബയൽ ഇടപെടലുകൾ ചെടികളുടെ ആരോഗ്യം മെച്ചപ്പെടുത്തുകയും വിളവ് വർദ്ധിപ്പിക്കുകയും ചെയ്തു.
വിലകൂടിയ സപ്ലിമെന്റുകളോ വിദേശ ഉൽപ്പന്നങ്ങളോ തേടി പോകുന്നതിനേക്കാൾ, അനീമിയ പോലുള്ള ഗുരുതരമായ ആരോഗ്യപ്രശ്നങ്ങൾ കുറയ്ക്കുന്നതിന് നമ്മുടെ പരമ്പരാഗതവും പ്രാദേശികവുമായ ആഹാരരീതി സ്വീകരിക്കുന്നത് ഏറെ ഫലപ്രദമാണെന്ന് തെളിയിക്കപ്പെട്ടതായി ശാസ്ത്രജ്ഞൻ ഉപസംഹരിച്ചു.
AAD 2026 ന്റെ കാര്യപരിപാടികൾ അറിയുന്നതിന് ലിങ്കിൽ ക്ലിക്ക് ചെയ്യുക:
https://www.cseindia.org/page/aaddialogue2026
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)