മാറുന്ന മൺസൂൺ: സൂപ്പർ എൽ നിനോ വർഷത്തിൽ, കാലാവസ്ഥാ വ്യതിയാനം ഇന്ത്യയുടെ മഴയെ ആശ്രയിച്ചുള്ള സമ്പദ്‌വ്യവസ്ഥയെ എങ്ങനെ ബാധിക്കുമെന്ന് കാത്തിരുന്ന് കാണാം

ക്രിക്കറ്റിനോടുള്ള നമ്മുടെ ദേശീയ വികാരത്തോട് തുല്യം നിൽക്കുന്ന, ഒരുപക്ഷേ ഇന്ത്യയിലാകമാനമുള്ള ഒരേയൊരു പ്രതിഭാസം മൺസൂൺ മാത്രമായിരിക്കും. ഓരോ വർഷവും, കാലവർഷം അതിന്റെ ആദ്യ പ്രവേശന കേന്ദ്രമായ കേരളതീരത്ത് കൃത്യസമയത്ത് എത്തുമോ എന്നറിയാൻ നമ്മൾ ശ്വാസമടക്കിപ്പിടിച്ചാണ് കാത്തിരിക്കാറുള്ളത്. ഇന്ത്യൻ മഹാസമുദ്രത്തിൽ നിന്നും ബംഗാൾ ഉൾക്കടലിൽ നിന്നും കരയിലേക്ക് നീങ്ങുന്ന അതിന്റെ ഓരോ ചലനങ്ങളും വളരെ സൂക്ഷ്മമായാണ് നിരീക്ഷിക്കപ്പെടുന്നത്. അതുകൊണ്ടുതന്നെ, മഴയിൽ ചെറിയൊരു ഇടവേള ഉണ്ടാകുമ്പോൾ പോലും ജനങ്ങളുടെ നെഞ്ചിടിപ്പേറുന്നു. തങ്ങൾ നട്ടുവെച്ച പുത്തൻ വിളകൾക്കായി കർഷകർ ആകാശത്തേക്ക് നോക്കി മഴയ്ക്കായി പ്രാർത്ഥിക്കുന്നു; കൃഷിയിടം നനയ്ക്കുന്നതിനും വൈദ്യുതോത്പാദനത്തിനുമായി ജലാശയങ്ങൾ വീണ്ടും നിറയേണ്ടതുണ്ട്; വേനൽച്ചൂടിൽ ഉണങ്ങി വരണ്ട മണ്ണും സസ്യങ്ങളും വനങ്ങളും പുനർജനിക്കാൻ മഴത്തുള്ളികൾക്കായി കാത്തിരിക്കുകയാണ്.

ഇനി സർക്കാരുകളും പൈപ്പുകളും വഴിയാണ് കുടിവെള്ളം ലഭിക്കുന്നതെന്ന് വിശ്വസിക്കുന്ന, പ്രകൃതിയുമായി യാതൊരു ബന്ധവുമില്ലാത്ത നഗരവാസികളായ നമ്മൾ പോലും കടുത്ത ചൂടിൽ നിന്ന് ആശ്വാസം തേടി മൺസൂണിന്റെ വരവിനായി കാത്തിരിക്കാറുണ്ട്. ഉണങ്ങി വരണ്ട മണ്ണിലേക്ക് വീഴുന്ന ആദ്യ മഴത്തുള്ളികളുടെ സുഗന്ധത്തോളം വശീകരിക്കുന്ന മറ്റൊന്നുമില്ല. അത് നമ്മുടെ സന്തോഷത്തിന്റെ നിമിഷമാണ്. എങ്കിൽപ്പോലും, ഇന്ത്യൻ മൺസൂണിനെക്കുറിച്ചോ, അത് ആഗോള കാലാവസ്ഥാ വ്യൂഹങ്ങളുമായി എങ്ങനെ പരസ്പരം ബന്ധപ്പെട്ടിരിക്കുന്നുവെന്നോ നമ്മൾ ഇനിയും പൂർണ്ണമായി മനസ്സിലാക്കിയിട്ടില്ല; കൂടാതെ കാലാവസ്ഥാ വ്യതിയാനം ലോകത്തിലെ സമുദ്ര പ്രവാഹങ്ങളെയും കാറ്റിന്റെ ഗതിയെയും മഴ സംവിധാനങ്ങളെയും മാറ്റിമറിക്കുമ്പോൾ ഉണ്ടാകാൻ പോകുന്ന പ്രത്യാഘാതങ്ങളെക്കുറിച്ചും നമ്മൾ അജ്ഞരാണ്.

ഈ വർഷത്തെ എൽ നിനോ ജൂൺ മുതൽ ഓഗസ്റ്റ് വരെയുള്ള മാസങ്ങളിൽ കൂടുതൽ ശക്തമാകുമെന്നാണ് കരുതപ്പെടുന്നത്. ഇതേതുടർന്ന്, ഇത്തവണ സാധാരണ ലഭിക്കുന്നതിലും കുറഞ്ഞ മഴ മാത്രമായിരിക്കും മൺസൂണിൽ ലഭിക്കുകയെന്ന് ഇന്ത്യൻ കാലാവസ്ഥാ വകുപ്പ് (IMD) പ്രവചിക്കുന്നു. ഇതിന്റെ ഏറ്റവും മോശമായ ആഘാതത്തെ ഒരു പരിധിവരെ നിയന്ത്രിക്കാൻ സാധിക്കുന്ന ഒരു പ്രതിഭാസമാണ് 'ഇന്ത്യൻ ഓഷ്യൻ ഡൈപോൾ' (IOD) വ്യവസ്ഥ. പടിഞ്ഞാറൻ ഇന്ത്യൻ മഹാസമുദ്രത്തിലെയും (കിഴക്കൻ ആഫ്രിക്കൻ തീരം) കിഴക്കൻ ഇന്ത്യൻ മഹാസമുദ്രത്തിലെയും (ഇന്തോനേഷ്യൻ തീരം) താപനില തമ്മിലുള്ള വ്യത്യാസത്തെ അടിസ്ഥാനമാക്കിയാണ് ഇത് അളക്കുന്നത്. പടിഞ്ഞാറൻ മേഖലയിൽ കൂടുതൽ ചൂടുള്ള ജലം രൂപപ്പെടുന്ന ഒരു പോസിറ്റീവ് ഐ.ഒ.ഡി (Positive IOD) അവസ്ഥയ്ക്ക്, ശക്തമായ എൽ നിനോയുടെ ദോഷകരമായ പ്രത്യാഘാതങ്ങളെ ചെറുക്കാൻ സാധിക്കും. എന്നാൽ, ഈ വർഷം ഐ.ഒ.ഡി നിഷ്പക്ഷമായ (Neutral IOD) അവസ്ഥയിലായിരിക്കുമെന്നാണ് കാലാവസ്ഥാ വകുപ്പ് കണക്കുകൂട്ടുന്നത്; മൺസൂൺ സീസണിന്റെ അവസാനത്തോടെ മാത്രമേ ഇത് പോസിറ്റീവ് ഐ.ഒ.ഡി അവസ്ഥയിലേക്ക് മാറാൻ സാധ്യതയുള്ളൂ. ഇതൊരു നല്ല വാർത്തയല്ല.

ഇതുമാത്രമല്ല പ്രശ്നം. ആഗോള കാലാവസ്ഥ അതിവേഗം നമ്മുടെ നിയന്ത്രണം വിട്ടുപോകുകയാണ്; ഇത് മൺസൂണിനെ കൂടുതൽ വഷളാക്കാനും താളംതെറ്റിക്കാനും മാത്രമേ കാരണമാകൂ. ഒരു വശത്ത്, കാലാവസ്ഥാ വ്യതിയാനം കാരണം അതിതീവ്ര മഴ ലഭിക്കുന്ന ദിവസങ്ങളുടെ എണ്ണത്തിൽ വലിയ വർദ്ധനവാണ് നാം കാണുന്നത്. കഴിഞ്ഞ കുറച്ചു വർഷങ്ങളിലെ നമ്മുടെ ഡാറ്റ (Data) പരിശോധിച്ചാൽ, ഇന്ത്യയിൽ പ്രതിദിനം ശരാശരി ഒരു അതിതീവ്ര കാലാവസ്ഥാ പ്രതിഭാസമെങ്കിലും സംഭവിക്കുന്നതായി കാണാം; അതായത്, മൊത്തം ദിവസങ്ങളിൽ 68 മുതൽ 95 ശതമാനം ദിവസങ്ങളിലും കനത്തതോ അതിതീവ്രമോ ആയ മഴ, പ്രളയം, ഉരുൾപൊട്ടൽ എന്നിവ ഉണ്ടായിട്ടുണ്ട്. ചുരുക്കത്തിൽ, കുറഞ്ഞ ദിവസങ്ങൾക്കുള്ളിൽ കൂടുതൽ മഴ പെയ്യുന്ന അവസ്ഥയാണ് ഇപ്പോഴുള്ളത്. ഇത് പ്രളയത്തിന് കാരണമാകുമെന്നതിനാൽ വലിയൊരു ആശങ്കയാണ് സൃഷ്ടിക്കുന്നത്. മാത്രവുമല്ല, ഈ മഴവെള്ളം സംഭരിച്ചു നിർത്താനും ഭൂഗർഭ-ഉപരിതല ജലാശയങ്ങൾ റീചാർജ് ചെയ്യാനും നമുക്ക് സാധിച്ചില്ലെങ്കിൽ, ഇത് ജലക്ഷാമവും വനശീകരണവും വരുംദിവസങ്ങളിൽ കൂടുതൽ രൂക്ഷമാക്കും.

മറുവശത്താകട്ടെ, പടിഞ്ഞാറൻ അസ്വസ്ഥതകൾ (Western Disturbances - WD) - മെഡിറ്ററേനിയൻ കടലിൽ നിന്ന് പശ്ചിമേഷ്യ വഴി ഉത്ഭവിച്ച് ഉത്തരേന്ത്യയിൽ മഴയും മഞ്ഞും എത്തിക്കുന്ന ഈർപ്പമുള്ള കാറ്റ് - വലിയ മാറ്റങ്ങൾക്ക് വിധേയമാകുന്നതായി കാണാം. ഹിമാലയത്തിൽ മഞ്ഞുവീഴ്ച കുറയുന്നത് ഇതിന് തെളിവാണ്. സാധാരണയായി ശീതകാലത്ത് ഉണ്ടാകാറുള്ള ഇവ, ഇപ്പോൾ വേനൽക്കാലത്ത് കൂടുതലായി എത്തുകയും മൺസൂൺ സമയത്ത് പോലും സജീവമായി തുടരുകയും ചെയ്യുന്നു. ഇത് കടുത്ത വേനൽ മാസങ്ങളിൽ ആശ്വാസകരമായ മഴ നൽകുമെങ്കിലും, വിളവെടുപ്പ് കഴിഞ്ഞ കാർഷിക വിളകളെ ഇത് പൂർണ്ണമായും നശിപ്പിക്കുകയും ചെയ്യുന്നു. കഴിഞ്ഞ കുറച്ചുവർഷങ്ങളായി, ഈ പടിഞ്ഞാറൻ അസ്വസ്ഥതകൾ മൺസൂൺ ന്യൂനമർദ്ദങ്ങളുമായി കൂട്ടിമുട്ടുന്നത് അതിതീവ്ര മഴയ്ക്കും മേഘവിസ്ഫോടനങ്ങൾക്കും (Cloudbursts) കാരണമാകുന്നുണ്ട്. കഴിഞ്ഞ വർഷം ഹിമാലയൻ സംസ്ഥാനങ്ങളിൽ ഭീകരമായ പെട്ടെന്നുള്ള പ്രളയത്തിലേക്കും (Flash floods) ഉരുൾപൊട്ടലിലേക്കും നയിച്ചത് ഇതേ പ്രതിഭാസമായിരുന്നു.

ലോകത്തിലെ കാലാവസ്ഥയ്ക്ക് അതിരുകളില്ല - മഴ, ചൂട്, മഞ്ഞ്, തണുപ്പ് എന്നിവയെ നിയന്ത്രിക്കുന്ന കാറ്റിന്റെയും സമുദ്രപ്രവാഹങ്ങളുടെയും വ്യവസ്ഥകളെല്ലാം പരസ്പരം ബന്ധപ്പെട്ടിരിക്കുന്നു. ഓരോ വ്യക്തിഗത രാജ്യങ്ങളിൽ നിന്നും പുറന്തള്ളപ്പെടുകയും എന്നാൽ ആഗോള അന്തരീക്ഷത്തെ മുഴുവൻ മൂടുകയും ചെയ്യുന്ന ഹരിതഗൃഹ വാതക ഉദ്‌വമനം (Greenhouse gas emissions) എന്ന ആഗോള പ്രതിസന്ധി ഈ സംവിധാനങ്ങളെ വല്ലാതെ ബാധിക്കുന്നുണ്ട്. അങ്ങനെ കാലാവസ്ഥാ വ്യതിയാനം കാരണം താപനില ഉയരുമ്പോൾ, ആർട്ടിക് പ്രദേശം ചൂടുപിടിക്കുകയും അത് പോളാർ ജെറ്റ് സ്ട്രീമുകളെ (Polar jet streams) ദുർബലപ്പെടുത്തുകയും ചെയ്യുന്നു. ഇത് ഭൂമധ്യരേഖയും ധ്രുവങ്ങളും തമ്മിലുള്ള താപനിലയിലെ വ്യത്യാസം കുറയ്ക്കുന്നതിലേക്ക് നയിക്കുകയും, തൽഫലമായി ഇന്ത്യയിൽ അകാല മഴയ്ക്ക് കാരണമാകുന്ന പടിഞ്ഞാറൻ അസ്വസ്ഥതകളെ (WDs) സ്വാധീനിക്കുകയും ചെയ്യുന്നു.

ഇത് എന്തുകൊണ്ട് ഇത്ര പ്രധാനപ്പെട്ടതാകുന്നു എന്ന് നിങ്ങൾ ചോദിച്ചേക്കാം. നമ്മുടെ കൃത്രിമ ജലസേചന സംവിധാനങ്ങളും ആധുനിക വാട്ടർ എഞ്ചിനീയറിംഗും മഴയെ ആശ്രയിച്ചുള്ള നമ്മുടെ നിലനിൽപ്പിനെ ഒരു പരിധിവരെ കുറച്ചിട്ടുണ്ടല്ലോ. എന്നാൽ യഥാർത്ഥ വസ്തുത എന്തെന്നാൽ, ഇന്ത്യ ഇപ്പോഴും മൺസൂൺ ആഘാതങ്ങളെ പൂർണ്ണമായി പ്രതിരോധിക്കാൻ സജ്ജമല്ല എന്നതാണ്. നമുക്ക് ഭക്ഷ്യോത്പാദനത്തിനായി മഴവെള്ളം സംഭരിക്കേണ്ടതുണ്ട് - ഇന്ത്യയിലെ കൃഷിയുടെ ഭൂരിഭാഗവും മഴയെ ആശ്രയിച്ചുള്ളതാണ്; ജലസേചനമുള്ള കൃഷി പോലും ഭൂഗർഭജലത്തെയാണ് വൻതോതിൽ ആശ്രയിക്കുന്നത്. രാജ്യത്തെ കുടിവെള്ളത്തിന്റെ 70 ശതമാനത്തിലധികവും ഭൂഗർഭജല സ്രോതസ്സുകളിൽ നിന്നാണ് കണ്ടെത്തുന്നത്. ഈ കാരണങ്ങൾ കൊണ്ടാണ് ഇന്ത്യയുടെ യഥാർത്ഥ ധനമന്ത്രി എന്ന് വിശേഷിപ്പിക്കപ്പെടുന്ന 'ഇന്ത്യൻ മൺസൂൺ' നമ്മുടെ പൂർണ്ണമായ ആദരവ് അർഹിക്കുന്നത്. എപ്പോൾ, എവിടെ പെയ്താലും മഴയുടെ ഓരോ തുള്ളിയും നമ്മൾ വിലമതിക്കേണ്ടതുണ്ട്.

(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)