രാജ്യതലസ്ഥാനത്തെ വേനൽക്കാലം കടുത്ത പരീക്ഷണങ്ങളുടേതാണ്. ചുട്ടുപൊള്ളുന്ന ചൂടും പൊടിക്കാറ്റും അസഹനീയമായ അത്യുഷ്ണവും നിറഞ്ഞ നാളുകൾ. എന്നാൽ ഡൽഹിയിലെ ഈ കഠിനമായ വേനലിലും നമുക്ക് സന്തോഷം നൽകുന്ന ഒരു കാര്യമുണ്ട്.
എല്ലാ വർഷവും കത്തുന്ന വേനൽച്ചൂടിനിടയിലും പ്രകൃതി ഡൽഹിയിൽ ഒരു സ്വർണ്ണവർഷം ചൊരിയാറുണ്ട്; അമാൽത്താസ് അഥവാ കണിക്കൊന്ന മരങ്ങൾ (കാസ്സിയ ഫിസ്റ്റുല) പൂത്തുലയുന്ന വസന്തകാലമാണത്
പല തരത്തിൽ നോക്കിയാൽ, കോൺക്രീറ്റ് കെട്ടിടങ്ങൾ വിഴുങ്ങിയ രാജ്യതലസ്ഥാനത്തുനിന്ന് പതിയെ അപ്രത്യക്ഷമായിക്കൊണ്ടിരിക്കുന്ന പഴയൊരു ഡൽഹിയുടെ ഓർമ്മപ്പെടുത്തൽ കൂടിയാണ് ഈ കണിക്കൊന്ന വസന്തം. കോൺക്രീറ്റ് കെട്ടിടങ്ങൾ കവർന്നെടുത്ത ഡൽഹിയുടെ പ്രകൃതി സൗന്ദര്യത്തിന് മാറ്റുകൂട്ടാൻ വേനൽക്കാലത്ത് കണ്ണിന് കുളിർമയേകി സ്വർണ്ണ വർണത്തിൽ പൂത്തുലഞ്ഞു നിൽക്കുന്ന കൊന്നമരങ്ങളുടെ അതിമനോഹരമായ കാഴ്ച്ചയാണിപ്പോൾ നഗരത്തിലെങ്ങും