വടക്കൻ ഇന്ത്യൻ മഹാസമുദ്ര മേഖലയിൽ 2026-ലെ ആദ്യ ചുഴലിക്കാറ്റ് അടുത്ത ആഴ്ച ബംഗാൾ ഉൾക്കടലിൽ രൂപപ്പെട്ടേക്കാം. ഇത് ഒഡീഷ, ആന്ധ്രാപ്രദേശ് തീരങ്ങളിലേക്ക് നീങ്ങാനാണ് സാധ്യത. എന്നാൽ ന്യൂനമർദ്ദം രൂപപ്പെട്ട ശേഷമുള്ള അന്തരീക്ഷ, സമുദ്ര സ്ഥിതിഗതികൾക്ക് അനുസരിച്ചു മാത്രമേ ചുഴലിക്കാറ്റിന്റെ കൃത്യമായ ഗതിയും ശക്തിയും വ്യക്തമാകൂ.
ഈ ചുഴലിക്കാറ്റ് രൂപപ്പെടുകയാണെങ്കിൽ അതിന് 'അർണബ്' (Arnab) എന്നായിരിക്കും പേരിടുക. 2025 നവംബറിൽ ശ്രീലങ്കയിലും ഇന്ത്യയിലുമായി 600-ലധികം ആളുകളുടെ ജീവനെടുത്ത 'ദിത്വ' (Ditwah) ചുഴലിക്കാറ്റിന് ശേഷം ഈ മേഖലയിൽ രൂപപ്പെടുന്ന ആദ്യ ചുഴലിക്കാറ്റായിരിക്കും ഇത്.
വടക്കൻ തായ്ലൻഡിന് മുകളിൽ ഉപരിതല ചക്രവാതച്ചുഴി രൂപപ്പെട്ടതായി സെപ്റ്റംബർ 17-ന് കേന്ദ്ര കാലാവസ്ഥാ വകുപ്പ് (IMD) അറിയിച്ചിരുന്നു. സെപ്റ്റംബർ 18 വൈകുന്നേരത്തോടെ വടക്കൻ അന്തമാൻ കടലിലേക്ക് പ്രവേശിക്കുമെന്നാണ് കാലാവസ്ഥാ ഏജൻസിയുടെ വിലയിരുത്തൽ.
അന്തരീക്ഷത്തിന്റെ ഉയർന്ന തട്ടിലുള്ള ഈ ചക്രവാതച്ചുഴി, വടക്കൻ അന്തമാൻ കടലിന് മുകളിൽ ഉപരിതല ന്യൂനമർദ്ദത്തിന് കാരണമാകുമെന്ന് ഐ.എം.ഡി.യുടെ ഏറ്റവും പുതിയ കാലാവസ്ഥാ പ്രവചനത്തിൽ പറയുന്നു. അതിനുശേഷം ഇത് ക്രമേണ ശക്തി പ്രാപിച്ച് പടിഞ്ഞാറ്, വടക്കുപടിഞ്ഞാറൻ ദിശയിലേക്ക് നീങ്ങി, തെക്കൻ ഒഡീഷയുടെയും വടക്കൻ ആന്ധ്രാപ്രദേശിന്റെയും തീരങ്ങളിലേക്ക് സഞ്ചരിക്കാൻ സാധ്യതയുണ്ട്.
യൂറോപ്യൻ സെന്റർ ഫോർ മീഡിയം-റേഞ്ച് വെതർ ഫോർകാസ്റ്റ്സിൽ (ECMWF) നിന്നുള്ള വിവരങ്ങൾ അടിസ്ഥാനമാക്കി വിൻഡി.കോമിൽ (windy.com) ലഭ്യമായ കാലാവസ്ഥാ മാപ്പുകളിൽ, സെപ്റ്റംബർ 23-24 തീയതികളിൽ കൃത്യമായ ആകൃതിയില്ലാത്ത (distorted eye) ഒരു ചുഴലിക്കാറ്റ് രൂപപ്പെടുന്നത് ദൃശ്യമാണ്.
അമേരിക്കയുടെ ഗ്ലോബൽ ഫോർകാസ്റ്റിംഗ് സിസ്റ്റത്തിൽ (GFS) നിന്നുള്ള വിവരങ്ങളും ഇതേ സമയത്ത് തന്നെ കൃത്യമായ ആകൃതിയില്ലാത്ത ഉപരിതലത്തോട് കൂടിയ ചുഴലിക്കാറ്റ് രൂപപ്പെടാൻ സാധ്യതയുള്ളതായി കാണിക്കുന്നു.
ECMWF, GFS എന്നീ രണ്ട് പ്രവചന മാതൃകകളും ഒരുപോലെ ചുഴലിക്കാറ്റ് സാധ്യത കാണിക്കുന്നത് കാറ്റിന്റെ സാന്നിധ്യത്തിന് ആക്കം കൂട്ടുന്നുണ്ടെങ്കിലും, പ്രവചനങ്ങളിൽ അടിക്കടിയുണ്ടാകുന്ന മാറ്റങ്ങൾ ഇതിന്റെ ഗതി നിർണ്ണയിക്കുന്നത് പ്രയാസകരമാക്കുന്നുണ്ട്. ഈ അനിശ്ചിതത്വം കാരണം, ന്യൂനമർദ്ദം രൂപപ്പെടുന്നത് മുതൽ അതിനുണ്ടാകുന്ന മാറ്റങ്ങളും ശക്തിയും ഐ.എം.ഡി.ക്ക് വളരെ സൂക്ഷ്മമായി നിരീക്ഷിക്കേണ്ടി വരും.
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)