വികസിത് ഭാരത്-ഗാരന്റി ഫോർ റോസ്ഗാർ ആൻഡ് ആജീവീക മിഷൻ (ഗ്രാമീൺ) അഥവാ വി.ബി-ജി.റാം.ജി (VB-G RAM G) നിയമപ്രകാരമുള്ള പ്രവർത്തനങ്ങൾക്കായി 2026-27 സാമ്പത്തിക വർഷത്തിൽ കേന്ദ്രവിഹിതമായി 95,692.31 കോടി രൂപ വകയിരുത്തിയതായി കേന്ദ്ര ഗ്രാമവികസന മന്ത്രി ശിവരാജ് സിംഗ് ചൗഹാൻ ലോകസഭയെ അറിയിച്ചു.
ഗ്രാമീണ തൊഴിലുറപ്പ് പദ്ധതിയുടെ ചരിത്രത്തിൽ ബജറ്റ് പ്രഖ്യാപന ഘട്ടത്തിൽ അനുവദിക്കുന്ന ഏറ്റവും വലിയ തുകയാണിത്. സംസ്ഥാനങ്ങളുടെ വിഹിതം കൂടി കണക്കിലെടുക്കുമ്പോൾ, പദ്ധതിയുടെ ആകെ ചെലവ് 1.51 ലക്ഷം കോടി രൂപയോളം വരുമെന്നും മന്ത്രി സഭയിൽ വ്യക്തമാക്കി.
ലോകാരോഗ്യ സംഘടനയുടെ (WHO) 'ഗ്ലോബൽ ടി.ബി റിപ്പോർട്ട് 2025' പ്രകാരം, ഇന്ത്യയിലെ വാർഷിക ക്ഷയരോഗ വ്യാപന നിരക്കിൽ 21 ശതമാനം കുറവുണ്ടായതായി കേന്ദ്ര ആരോഗ്യ കുടുംബക്ഷേമ സഹമന്ത്രി അനുപ്രിയ പട്ടേൽ രാജ്യസഭയിൽ അറിയിച്ചു. 2015-ൽ ലക്ഷം ജനസംഖ്യയിൽ 237 പേർക്കെന്ന നിരക്കിൽ ഉണ്ടായിരുന്ന രോഗബാധ, 2024-ൽ ലക്ഷം ജനസംഖ്യയിൽ 187 ആയി കുറഞ്ഞു.
മരണനിരക്ക് 25 ശതമാനമായി കുറഞ്ഞിട്ടുണ്ട്; 2015-ൽ ലക്ഷം ജനസംഖ്യയിൽ 28 മരണം എന്നതിൽ നിന്ന് 2024-ൽ അത് 21 മരണമായി കുറഞ്ഞു. ചികിത്സാ കവറേജ് 2015-ലെ 53 ശതമാനത്തിൽ നിന്ന് 2024-ൽ 92 ശതമാനമായി വർദ്ധിച്ചു.
ആഗോളതലത്തിലെ മൊത്തം ക്ഷയരോഗ ബാധയുടെ ഏകദേശം 25 ശതമാനവും ഇന്ത്യയിലാണെന്നും, രോഗവ്യാപന നിരക്കിൽ ആഗോളതലത്തിൽ 38-ാം സ്ഥാനത്താണ് ഇന്ത്യയെന്നും മന്ത്രി പട്ടേൽ പറഞ്ഞു.
പി.എം സൂര്യ ഘർ മുഫ്ത് ബിജിലി യോജന (PMSGMBY) പദ്ധതിക്ക് കീഴിൽ, 2026 മാർച്ച് 5 വരെയുള്ള കണക്കുകൾ പ്രകാരം ജമ്മു കശ്മീർ കേന്ദ്രഭരണ പ്രദേശത്ത് നാഷണൽ പോർട്ടലിൽ ആകെ 97,260 അപേക്ഷകൾ ലഭിച്ചിട്ടുണ്ടെന്നും, 25,160 റൂഫ്ടോപ്പ് സൗരോർജ്ജ സംവിധാനങ്ങൾ സ്ഥാപിച്ചിട്ടുണ്ടെന്നും പുതിയ-പുനരുപയോഗ ഊർജ്ജ-വൈദ്യുതി സഹമന്ത്രി ശ്രീപദ് യെസ്സോ നായിക് രാജ്യസഭയെ അറിയിച്ചു.
ഈ പദ്ധതിയിലെ ഗുണഭോക്താക്കൾക്ക് കേന്ദ്ര സാമ്പത്തിക സഹായമായി 182.21 കോടി രൂപ കേന്ദ്ര സർക്കാർ വിതരണം ചെയ്തിട്ടുണ്ടെന്നും മന്ത്രി സഭയിൽ വ്യക്തമാക്കി.
ലഡാക്കിലെ ഹോർട്ടികൾച്ചർ (ഉദ്യാനകൃഷി) മേഖലയിൽ സുസ്ഥിരമായ ജലപരിപാലന രീതികൾ പ്രോത്സാഹിപ്പിക്കുന്നതിനായി ലഡാക്ക് കേന്ദ്രഭരണ പ്രദേശം നടപടികൾ സ്വീകരിക്കുന്നുണ്ടെന്നും, ഇതിൽ കാർഗിലിലെ സോദ് (Sodh) മേഖലയും ഉൾപ്പെടുമെന്നും കേന്ദ്ര കൃഷി-കർഷകക്ഷേമ സഹമന്ത്രി ഭഗീരഥ് ചൗധരി ലോകസഭയെ അറിയിച്ചു. സോദ് മേഖലയിലെ ഏകദേശം എട്ട് ഹെക്ടർ ഭൂമി മൈക്രോ ഇറിഗേഷൻ (സൂക്ഷ്മ ജലസേചന) പദ്ധതിക്ക് കീഴിൽ കൊണ്ടുവന്നതായും മന്ത്രി സഭയിൽ വ്യക്തമാക്കി.
പ്രകൃതിദത്ത കൃഷി പ്രോത്സാഹിപ്പിക്കുന്നതിനായി തെലങ്കാനയുൾപ്പെടെയുള്ള സംസ്ഥാനങ്ങളിൽ കേന്ദ്ര സർക്കാർ 'നാഷണൽ മിഷൻ ഓൺ നാച്ചുറൽ ഫാമിംഗ്' (National Mission on Natural Farming) നടപ്പിലാക്കിവരികയാണെന്ന് കേന്ദ്ര കൃഷി-കർഷകക്ഷേമ സഹമന്ത്രി ഭഗീരഥ് ചൗധരി ലോകസഭയെ അറിയിച്ചു.
2024-25 സാമ്പത്തിക വർഷത്തിൽ പ്രകൃതിദത്ത കൃഷി നടപ്പിലാക്കുന്നതിനായി കേന്ദ്ര സർക്കാർ തെലങ്കാനയ്ക്ക് 17.955 ലക്ഷം രൂപയും, 2025-26 സാമ്പത്തിക വർഷത്തിൽ 1,323.51 ലക്ഷം രൂപയും അനുവദിച്ചിട്ടുണ്ടെന്നും മന്ത്രി ലോകസഭയിൽ വ്യക്തമാക്കി.
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)