ഇന്ത്യയിൽ നിലവിലുള്ള ദേശീയ-സംസ്ഥാന തലങ്ങളിലെ ഇലക്ട്രിക് വാഹന (EV) ലക്ഷ്യങ്ങൾ കൃത്യമായി നടപ്പിലാക്കുകയാണെങ്കിൽ, 2050-ഓടെ ഗതാഗത മേഖലയിൽ നിന്നുള്ള കാർബൺ മലിനീകരണം പകുതിയായി കുറയ്ക്കാൻ സാധിക്കുമെന്ന് പഠനം വ്യക്തമാക്കുന്നു. ഐസിസിടി (ICCT) വർഷം തോറും പുറത്തിറക്കുന്ന 'വിഷൻ 2050' റിപ്പോർട്ടിലാണ് ഈ കണ്ടെത്തലുകളുള്ളത്. നിലവിലുള്ള നയങ്ങൾ വാഹന വിൽപ്പനയെയും ഊർജ്ജ ഉപയോഗത്തെയും മലിനീകരണത്തെയും എങ്ങനെ ബാധിക്കുമെന്ന് ഈ പഠനം വിലയിരുത്തുന്നു.
ലോകത്തെ വളർന്നുവരുന്ന വിപണികളിൽ, ഇന്ത്യയുടെ സ്ഥാനം ഏറെ പ്രത്യേകതയുള്ളതാണെന്ന് പഠനം ചൂണ്ടിക്കാട്ടുന്നു. ഇലക്ട്രിക് വാഹനങ്ങളുടെ ഉപയോഗം ഇന്ത്യയിൽ ഇനിയും വർദ്ധിക്കാനുണ്ടെങ്കിലും, നിലവിൽ, രാജ്യത്ത് വിൽക്കുന്ന ഇവി വാഹനങ്ങളുടെ 80 ശതമാനവും ഇന്ത്യയിൽ തന്നെ നിർമ്മിക്കുന്നവയാണ് എന്നത് ശ്രദ്ധേയമാണ്. നിലവിലുള്ള പദ്ധതികൾ പൂർണ്ണമായി നടപ്പിലാക്കിയാൽ, 2050-ഓടെ മലിനീകരണം മാത്രമല്ല, ഇന്ധന ഇറക്കുമതിയും പകുതിയായി കുറയ്ക്കാൻ ഇന്ത്യക്ക് സാധിക്കും.
2070-ഓടെ രാജ്യം ലക്ഷ്യമിടുന്ന 'നെറ്റ് സീറോ' (മലിനീകരണം ഇല്ലാത്ത അവസ്ഥ) എന്ന സ്വപ്നത്തിലേക്ക് എത്താൻ ഇത് വലിയ സഹായമാകും. കൂടാതെ, ഇറക്കുമതി ചെയ്യുന്ന പെട്രോളിയം ഉൽപ്പന്നങ്ങളുടെ വിലയിലുണ്ടാകുന്ന മാറ്റങ്ങൾ രാജ്യത്തിന്റെ സാമ്പത്തിക വ്യവസ്ഥയെ ബാധിക്കുന്നത് കുറയ്ക്കാനും ഇതിലൂടെ സാധിക്കും. ഇന്ത്യയുടെ ഈ മാറ്റത്തിന് ആക്കം കൂട്ടുന്ന അഞ്ച് പ്രധാന പ്രവണതകളും റിപ്പോർട്ട് ചൂണ്ടിക്കാട്ടുന്നു:
ഇന്ത്യയുടെ തദ്ദേശീയ ഇവി നിർമ്മാണം വികസിത രാജ്യങ്ങളുടേതിന് തുല്യമാണ്.
വലിയ ചരക്ക് വാഹനങ്ങളെ ഇലക്ട്രിക് ആക്കുന്നതിലൂടെ വലിയ നേട്ടമുണ്ടാക്കാം.
ലോകത്ത് തന്നെ ഏറ്റവും വലിയ രീതിയിൽ മലിനീകരണം കുറയ്ക്കാൻ കഴിയുന്ന സാഹചര്യമാണ് ഇന്ത്യയിലുള്ളത്.
സർക്കാർ നയങ്ങളാണ് ഇന്ത്യയിലെ ഇവി വിപ്ലവത്തിന് പിന്നിലെ പ്രധാന ചാലകശക്തി.
2030-ന് ശേഷം ഇന്ത്യയിലെ ഇവി വിപണി വളരെ വേഗത്തിൽ വളരും.
ദേശീയ-സംസ്ഥാന തലങ്ങളിലെ നയങ്ങൾ പ്രായോഗികമാകുന്നതോടെ 2030-കളിൽ ഇന്ത്യയിലെ ഇലക്ട്രിക് വാഹന ഉപയോഗം വളരെ വേഗത്തിൽ വർദ്ധിക്കുമെന്ന് പഠനം വിലയിരുത്തുന്നു.
രാജ്യം വലിയ തോതിൽ വൈദ്യുതീകരണത്തിലേക്ക് മാറും; പ്രത്യേകിച്ച് ഇരുചക്ര-മുച്ചക്ര വാഹനങ്ങൾ, യാത്രാ വാഹനങ്ങൾ എന്നിവയിലും ഘട്ടംഘട്ടമായി വലിയ ചരക്ക് ലോറികളിലും ഈ മാറ്റം പ്രകടമാകും.
“ഇതിലൂടെ ഇന്ത്യക്ക് തദ്ദേശീയ നിർമ്മാണ മേഖലയെ ശക്തിപ്പെടുത്താനും, വായുവിന്റെ ഗുണനിലവാരം മെച്ചപ്പെടുത്താനും, പാരീസ് കാലാവസ്ഥാ ഉടമ്പടിയിലെ ലക്ഷ്യങ്ങൾക്കനുസരിച്ച് ഗതാഗത മേഖലയെ വികസിപ്പിക്കാനും സാധിക്കും,” എന്ന് റിപ്പോർട്ട് ചൂണ്ടിക്കാട്ടുന്നു.
“ശക്തമായ ആഭ്യന്തര ഇവി നിർമ്മാണ അടിത്തറയും, വളർന്നുവരുന്ന ഇന്ധനക്ഷമതാ മാനദണ്ഡങ്ങളും, സീറോ-എമിഷൻ ലക്ഷ്യങ്ങളും, സംസ്ഥാനതല നയങ്ങളും ഇന്ത്യക്കുണ്ട്. അതുകൊണ്ട് തന്നെ, പരിസ്ഥിതിക്കും വായുവിന്റെ ഗുണനിലവാരത്തിനും വലിയ ഗുണങ്ങൾ നൽകുന്നതോടൊപ്പം ഇലക്ട്രിക് വാഹനങ്ങളിലേക്കുള്ള മാറ്റം വേഗത്തിലാക്കാൻ ഇന്ത്യക്ക് സാധിക്കും,” എന്ന് ഐസിസിടി (ICCT) സീനിയർ റിസർച്ചർ, അർജിത് സെൻ പ്രസ്താവിച്ചു.
“ഇന്ത്യയുടെ ഇവി മാറ്റം എന്നത് കേവലം പരിസ്ഥിതിയുമായി ബന്ധപ്പെട്ട ഒരു അവസരം മാത്രമല്ല, വലിയൊരു സാമ്പത്തിക അവസരം കൂടിയാണ്. ഏകദേശം 80 ശതമാനം നിർമ്മാണവും രാജ്യത്തിനകത്ത് തന്നെ നടക്കുന്നു എന്നത്, ശുദ്ധമായ ഒരു ഗതാഗത ഭാവി പടുത്തുയർത്താൻ ആവശ്യമായ അടിത്തറ ഇന്ത്യക്ക് നേരത്തെ തന്നെയുണ്ടെന്ന് കാണിക്കുന്നു. ഇന്ധനക്ഷമതാ മാനദണ്ഡങ്ങളും സീറോ-എമിഷൻ ലക്ഷ്യങ്ങളും പോലുള്ള ശക്തമായ നിയമങ്ങൾ വഴി ഈ തദ്ദേശീയ സാധ്യതകളെ വേഗത്തിൽ വികസിപ്പിക്കാൻ കഴിയും. ഇത് രാജ്യത്തെ മൂല്യവർദ്ധിത ശൃംഖലകളെ ശക്തിപ്പെടുത്തുന്നതിനും തൊഴിലവസരങ്ങൾ സൃഷ്ടിക്കുന്നതിനും സഹായിക്കും. ഒപ്പം ലോകത്തിലെ തന്നെ ഏറ്റവും വലിയ മലിനീകരണ നിയന്ത്രണങ്ങളിലൊന്ന് യാഥാർത്ഥ്യമാക്കാനും ഇതിലൂടെ സാധിക്കും,” ഐസിസിടി (ICCT) ഇന്ത്യ മാനേജിംഗ് ഡയറക്ടർ അമിത് ഭട്ട് കൂട്ടിച്ചേർത്തു.
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)