OECD-FAO കാർഷിക ഔട്ട്ലുക്ക് (Agricultural Outlook) പ്രകാരം, 2035-ഓടെ ഉയർന്ന വരുമാനമുള്ള രാജ്യങ്ങളിലെ കർഷക തൊഴിലാളികളുടെ വരുമാനം ദക്ഷിണേഷ്യയിലെയും സബ് സഹാറൻ ആഫ്രിക്കയിലെയും തൊഴിലാളികളേക്കാൾ 20 മടങ്ങ് കൂടുതലായിരിക്കുമെന്ന് പ്രവചിക്കപ്പെടുന്നു.
അടുത്ത ദശകത്തിൽ ആഗോള കാർഷിക ഉൽപ്പാദനം 13 ശതമാനം വർദ്ധിക്കുമെന്നാണ് പ്രതീക്ഷിക്കുന്നത്; എന്നാൽ ഇതിന്റെ നേട്ടങ്ങൾ വിവിധ പ്രദേശങ്ങൾക്കിടയിൽ അസന്തുലിതമായാവും വീതിക്കപ്പെടുക.
സമ്പന്ന രാജ്യങ്ങളിലെ കർഷക തൊഴിലാളികളുടെ വാർഷിക വരുമാനം 2035-ഓടെ 22,155 ഡോളറായി ഉയരുമെന്ന് കണക്കാക്കുമ്പോൾ, ദക്ഷിണേഷ്യയിലും സബ് സഹാറൻ ആഫ്രിക്കയിലും ഇത് ഏകദേശം 1,100 ഡോളർ മാത്രമായിരിക്കും.
കാർഷിക മേഖലയിൽ നിന്ന് നേരിട്ടുള്ള ഹരിതഗൃഹ വാതക ഉദ്വമനം ഉയരുമ്പോഴും, കുറഞ്ഞ വരുമാനമുള്ള രാജ്യങ്ങളിൽ ഭക്ഷ്യസുരക്ഷാ-പോഷകാഹാര കുറവുകൾ തുടരാൻ തന്നെയാണ് സാധ്യതയെന്ന് റിപ്പോർട്ട് മുന്നറിയിപ്പ് നൽകുന്നു.
ഓർഗനൈസേഷൻ ഫോർ ഇക്കണോമിക് കോ-ഓപ്പറേഷൻ ആൻഡ് ഡെവലപ്മെന്റും (OECD) ഐക്യരാഷ്ട്രസഭയുടെ ഫുഡ് ആൻഡ് അഗ്രിക്കൾച്ചർ ഓർഗനൈസേഷനും (FAO) സംയുക്തമായി പുറത്തിറക്കിയ പുതിയ റിപ്പോർട്ട് പ്രകാരം, 2035-ഓടെ ഉയർന്ന വരുമാനമുള്ള രാജ്യങ്ങളിലെ കർഷക തൊഴിലാളികളുടെ വരുമാനം ദക്ഷിണേഷ്യയിലെയും സബ് സഹാറൻ ആഫ്രിക്കയിലെയും കർഷക തൊഴിലാളികളേക്കാൾ ഏകദേശം 20 മടങ്ങ് കൂടുതലായിരിക്കുമെന്ന് പ്രവചിക്കപ്പെടുന്നു.
'ഒ.ഇ.സി.ഡി-എഫ്.എ.ഒ കാർഷിക ഔട്ട്ലുക്ക് 2026-2035' (OECD-FAO Agricultural Outlook 2026-2035) പ്രകാരം, ഉയർന്ന വരുമാനമുള്ള രാജ്യങ്ങളിലെ ഒരു തൊഴിലാളിയുടെ ശരാശരി മൊത്തം കാർഷിക വരുമാനം 2035-ഓടെ 22,155 ഡോളറിൽ എത്തും. ഇതിനു വിപരീതമായി, സബ് സഹാറൻ ആഫ്രിക്കയിലെയും ദക്ഷിണേഷ്യയിലെയും കുറഞ്ഞ വരുമാനമുള്ള പ്രദേശങ്ങളിലെ കർഷക തൊഴിലാളികൾക്ക് ആ സമയത്ത് പ്രതിവർഷം ഏകദേശം 1,100 ഡോളർ മാത്രമേ വരുമാനം പ്രതീക്ഷിക്കാൻ സാധിക്കൂ.
അടുത്ത ദശകത്തിൽ ആഗോള കാർഷിക ഉൽപ്പാദനം 13 ശതമാനം വർദ്ധിക്കുമെന്ന് റിപ്പോർട്ട് വ്യക്തമാക്കുന്നു. എന്നാൽ ഉൽപ്പാദനക്ഷമത, യന്ത്രവൽക്കരണം, ഭൂമി ലഭ്യത, സാങ്കേതികവിദ്യ, നിക്ഷേപം എന്നിവയിലുള്ള ആഴത്തിലുള്ള വ്യത്യാസങ്ങൾ പ്രതിഫലിപ്പിച്ചുകൊണ്ട് ഈ നേട്ടങ്ങൾ തുല്യമല്ലാത്ത രീതിയിലാവും വിഭജിക്കപ്പെടുക.
ഉൽപ്പാദനക്ഷമതയിലെ നേട്ടങ്ങളും അസന്തുലിതമായ ഫലങ്ങളും
അടുത്ത ദശകത്തിൽ ആഗോളതലത്തിൽ ഒരു തൊഴിലാളിയുടെ ശരാശരി മൊത്തം കാർഷിക വരുമാനത്തിൽ 9 ശതമാനം വർദ്ധനവുണ്ടാകുമെന്നാണ് പ്രതീക്ഷിക്കുന്നത്. ഇത് പ്രധാനമായും ഉയർന്ന വിലയേക്കാൾ ഉൽപ്പാദനക്ഷമതയിലെ മെച്ചപ്പെടൽ കാരണമായിരിക്കും സംഭവിക്കുക. ഉൽപ്പാദനച്ചെലവ് വർദ്ധിക്കുമ്പോഴും, യഥാർത്ഥ കാർഷിക വിലകൾ വലിയ മാറ്റമില്ലാതെ സ്ഥിരതയോടെ തുടരുമെന്നാണ് പ്രവചിക്കപ്പെടുന്നത്.
ഒരു കർഷക തൊഴിലാളിയുടെ യഥാർത്ഥ വരുമാനമായി കണക്കാക്കുന്ന ആഗോള ശരാശരി കാർഷിക തൊഴിൽ ഉൽപ്പാദനക്ഷമത 2035-ഓടെ 3,800 ഡോളറായിരിക്കുമെന്ന് റിപ്പോർട്ട് കണക്കാക്കുന്നു. എന്നാൽ ഈ ശരാശരി കണക്ക് യഥാർത്ഥത്തിലുള്ള വലിയൊരു വിടവിനെ മറച്ചുവെക്കുന്നുണ്ട്. ഉയർന്ന വരുമാനമുള്ള രാജ്യങ്ങളിൽ, കാർഷിക തൊഴിൽ ഉൽപ്പാദനക്ഷമത 2023-25 കാലയളവിൽ 21,100 ഡോളറിന് തൊട്ടുമുകളിലായിരുന്നെങ്കിൽ 2035-ഓടെ ഇത് 22,155 ഡോളറായി ഉയരുമെന്നാണ് പ്രതീക്ഷിക്കുന്നത്.
വടക്കേ അമേരിക്ക, പടിഞ്ഞാറൻ യൂറോപ്പ്, ഓഷ്യാനിയ എന്നീ പ്രദേശങ്ങളിലായിരിക്കും ഒരു തൊഴിലാളിയുടെ ഏറ്റവും ഉയർന്ന ഉൽപ്പാദനം രേഖപ്പെടുത്തുക. വലിയ ഭൂവുടമസ്ഥത, കുറഞ്ഞ തൊഴിൽ വിനിയോഗം, ഉയർന്ന തോതിലുള്ള യന്ത്രവൽക്കരണം എന്നിവയാണ് ഈ പ്രദേശങ്ങളുടെ പ്രത്യേകതയെന്ന് റിപ്പോർട്ട് പറയുന്നു.
മറുഭാഗത്താകട്ടെ, സബ് സഹാറൻ ആഫ്രിക്കയിലെയും ദക്ഷിണേഷ്യയിലെയും കുറഞ്ഞ വരുമാനമുള്ള പ്രദേശങ്ങളിലെ കർഷക തൊഴിലാളികൾ നിലവിൽ പ്രതിവർഷം ശരാശരി 930 ഡോളറാണ് സമ്പാദിക്കുന്നത്. 2035-ഓടെ ഇത് ഏകദേശം 1,100 ഡോളറായി മാത്രമേ ഉയരൂ എന്ന് റിപ്പോർട്ട് പ്രവചിക്കുന്നു - അതായത് ഒരു ദശകത്തിൽ വെറും 170 ഡോളറിന്റെ വർദ്ധനവ്.
ശരാശരി വരുമാനത്തിൽ പ്രവചിക്കപ്പെട്ടിട്ടുള്ള ഈ 9 ശതമാനം വർദ്ധനവ് ഒട്ടും സുരക്ഷിതമല്ല. കാർഷിക വിപണികളുടെ ചരിത്രപരമായ അസ്ഥിരത കണക്കിലെടുക്കുമ്പോൾ, 2035-ലെ മൊത്തം കാർഷിക വരുമാനം പ്രവചിക്കപ്പെട്ട അടിസ്ഥാന നിരക്കിനേക്കാൾ കുറഞ്ഞത് 12 ശതമാനമെങ്കിലും കുറയാൻ നാലിൽ ഒന്ന് (one-in-four) സാധ്യതയുണ്ടെന്ന് റിപ്പോർട്ട് വ്യക്തമാക്കുന്നു. കുറഞ്ഞ വരുമാനമുള്ള രാജ്യങ്ങളിൽ ഈ കുറവ് 20 ശതമാനത്തിലധികം ആയേക്കാം.
ഈ വരുമാന വ്യത്യാസം ഭക്ഷ്യസുരക്ഷയിലും ഉപഭോഗ രീതികളിലും പ്രതിഫലിക്കുന്നുണ്ടെന്ന് റിപ്പോർട്ട് കണ്ടെത്തുന്നു. ആരോഗ്യകരമായ ഭക്ഷണക്രമം പ്രോത്സാഹിപ്പിക്കുന്നതിനുള്ള ശ്രമങ്ങൾ നടക്കുന്നുണ്ടെങ്കിലും, സമ്പന്ന രാജ്യങ്ങളിൽ അമിതമായ ഭക്ഷണ ഉപഭോഗം തുടരാനാണ് സാധ്യത. അതേസമയം കുറഞ്ഞ വരുമാനമുള്ള രാജ്യങ്ങളിൽ, പ്രത്യേകിച്ച് സബ് സഹാറൻ ആഫ്രിക്കയിൽ, കുറഞ്ഞ കുടുംബ വരുമാനവും മറ്റ് സാമ്പത്തിക സമ്മർദ്ദങ്ങളും കാരണം ഭക്ഷ്യസുരക്ഷയിലും പോഷകാഹാരത്തിലും അവർ പിന്നോട്ട് തന്നെയായിരിക്കും.
കാർഷിക മേഖലയിലെ ഉദ്വമനം വർദ്ധിക്കും
ആഗോള, പ്രാദേശിക, ദേശീയ തലങ്ങളിലെ കാർഷിക ഉൽപ്പന്നങ്ങളുടെയും ജലവിഭവ ഭക്ഷ്യ വിപണികളുടെയും 10 വർഷത്തെ സാധ്യതകളെ ഈ ഔട്ട്ലുക്ക് വിലയിരുത്തുന്നുണ്ട്. ഉൽപ്പാദന നേട്ടങ്ങൾ പരിസ്ഥിതിക്ക് വലിയ ദോഷമുണ്ടാക്കിയേക്കാമെന്നും ഇത് മുന്നറിയിപ്പ് നൽകുന്നു.
കാർഷിക ഉൽപ്പാദന വളർച്ചയുടെ ഭൂരിഭാഗവും ഉൽപ്പാദനക്ഷമതയിലെ മെച്ചപ്പെടൽ മൂലമാണ് പ്രതീക്ഷിക്കുന്നതെങ്കിലും, കൃഷിഭൂമിയുടെ വ്യാപ്തിയും കന്നുകാലികളുടെ എണ്ണവും ഇനിയും വർദ്ധിപ്പിക്കേണ്ടി വരും. ഇതിന്റെ ഫലമായി, കാർഷിക മേഖലയിൽ നിന്നുള്ള നേരിട്ടുള്ള ഹരിതഗൃഹ വാതക ഉദ്വമനം വരും ദശകത്തിൽ 6.5 ശതമാനം വർദ്ധിക്കുമെന്നാണ് പ്രവചിക്കപ്പെടുന്നത്.
കന്നുകാലിക്കൂട്ടങ്ങളുടെ എണ്ണം വർദ്ധിക്കുന്നത് കാരണം ഈ വർദ്ധനവിന്റെ ഏകദേശം 77 ശതമാനവും കന്നുകാലി വളർത്തൽ മേഖലയിൽ നിന്നായിരിക്കും. നൈട്രസ് ഓക്സൈഡ് ഉദ്വമനം വർദ്ധിപ്പിക്കുന്ന രാസവളങ്ങളാണ് ബാക്കി 23 ശതമാനത്തിന് കാരണമാകുക.
"സുസ്ഥിരമായ ഉൽപ്പാദനക്ഷമതയുടെ വളർച്ച വേഗത്തിലാക്കുകയും സാങ്കേതിക വിദ്യയിലെ വിടവുകൾ നികത്തുകയും ചെയ്യുക എന്നതാണ് നയപരമായ വെല്ലുവിളി. ഇതിലൂടെ നിലവിലുള്ള നിരക്കുകളുമായി താരതമ്യം ചെയ്യുമ്പോൾ ഹരിതഗൃഹ വാതക ഉദ്വമനം പതുക്കെയാക്കാനോ കുറയ്ക്കാനോ സാധിക്കും. വളരുന്ന ജനസംഖ്യയുടെ മാറിക്കൊണ്ടിരിക്കുന്ന ഭക്ഷണരീതികൾക്ക് അനുസൃതമായി, ആഗോള ഭക്ഷ്യസുരക്ഷയും മെച്ചപ്പെട്ട പോഷകാഹാരവും ഉറപ്പാക്കിക്കൊണ്ട് വേണം ഇത് നേടിയെടുക്കാൻ", റിപ്പോർട്ടിൽ പറയുന്നു.
(പരിഭാഷ, എഡിറ്റിംഗ് സുരേന്ദ്രൻ കണ്ണൂർ)