കാലാവസ്ഥാ വ്യതിയാനത്തിനു വേഗത കൂടിക്കൊണ്ടിരിക്കുമ്പോഴും, ആവാസവ്യവസ്ഥകൾ വളരെ സാവധാനത്തിലാണ് മാറിക്കൊണ്ടിരിക്കുന്നത്. 2026 ഫെബ്രുവരി 3-ന് 'നേച്ചർ കമ്മ്യൂണിക്കേഷൻസ്' (Nature Communications) മാസികയിൽ പ്രസിദ്ധീകരിച്ച പുതിയ പഠനമനുസരിച്ച്, കാലാവസ്ഥാ വ്യതിയാനം ത്വരിതഗതിയിലായിട്ടും, കഴിഞ്ഞ നൂറ്റാണ്ടിൽ പല ആവാസവ്യവസ്ഥകളിലെയും ഹ്രസ്വകാല ജീവവർഗ്ഗ മാറ്റങ്ങൾ (Short-term species turnover) മന്ദഗതിയിലായിരിക്കുകയാണ്.
ഒരു നിശ്ചിത ജൈവസമൂഹത്തിൽ നിന്ന്, ചില വർഗ്ഗങ്ങൾ പുറത്തുപോകുകയും പകരം പുതിയവ വരികയും ചെയ്യുന്ന നിരക്കിനെയാണ് 'ടേൺഓവർ'എന്ന് വിളിക്കുന്നത്.
യുകെയിലെ, ക്വീൻ മേരി യൂണിവേഴ്സിറ്റിയിലെ ഗവേഷകർ, കഴിഞ്ഞ നൂറ്റാണ്ടിലെ കര, ശുദ്ധജലം, സമുദ്രം എന്നിവിടങ്ങളിലെ ജൈവവൈവിധ്യ സർവ്വേകൾ വിശകലനം ചെയ്തു. കഴിഞ്ഞ 100 വർഷത്തിനിടയിൽ, ഹ്രസ്വകാല ഇടവേളകളിലെ (1-5 വർഷം) ജീവവർഗ്ഗ മാറ്റത്തിന്റെ നിരക്ക് വർദ്ധിച്ചതിനേക്കാൾ കൂടുതൽ, കുറയുകയാണ് ചെയ്തതെന്ന് അവർ കണ്ടെത്തി. സാധാരണയായി മൂന്നിലൊന്ന് ഭാഗത്തോളമാണ് ഈ കുറവ് രേഖപ്പെടുത്തിയിരിക്കുന്നത്.
ജീവവർഗ്ഗങ്ങളുടെ ഘടനയിലുണ്ടാകുന്ന ഈ മാറ്റങ്ങൾ, പലപ്പോഴും കാലാവസ്ഥാ വ്യതിയാനത്തേക്കാൾ ഉപരിയായി ആവാസവ്യവസ്ഥയുടെ ആന്തരിക ചലനാത്മകതയുമായി ബന്ധപ്പെട്ടിരിക്കുന്നുവെന്ന് പഠനം സൂചിപ്പിക്കുന്നു. പരിസ്ഥിതി നാശവും പ്രാദേശികമായ ജീവവർഗ്ഗങ്ങളുടെ വംശനാശവുമാണ്, ഈ മന്ദഗതിയുടെ പ്രധാന കാരണങ്ങളെന്ന് ഗവേഷകർ പറയുന്നു.
വിവിധ തരം ജൈവസമൂഹങ്ങളിൽ ഈ ഫലം എങ്ങനെ ബാധിക്കുന്നു എന്ന് പരിശോധിക്കാൻ ഗവേഷകർ, നാല് പ്രധാന വിഭാഗങ്ങളെ പ്രത്യേകം വിശകലനം ചെയ്തു: ബെന്തോസ് (കടൽത്തട്ടിലെ ജീവികൾ), മത്സ്യങ്ങൾ, പക്ഷികൾ, സമ്മിശ്ര വർഗ്ഗങ്ങൾ.
പക്ഷികൾ, സമ്മിശ്ര വർഗ്ഗങ്ങൾ, ബെന്തോസ് എന്നിവയിൽ ഈ മന്ദഗതി ഒരുപോലെ പ്രകടമായിരുന്നു. എന്നാൽ മത്സ്യങ്ങളുടെ കാര്യത്തിൽ വ്യക്തമായ സൂചനകളൊന്നും ലഭിച്ചില്ല. മത്സ്യബന്ധന നിയന്ത്രണങ്ങൾ സ്വാഭാവികമായ മാറ്റങ്ങളെ തടസ്സപ്പെടുത്തുന്നതുകൊണ്ടാകാം ഇതെന്നാണ് അനുമാനിക്കുന്നത്.
പഠനത്തിന്റെ സഹരചയിതാവായ ആക്സൽ റോസ്ബർഗ് പറഞ്ഞു: "ഈ ഫലം എത്രത്തോളം ശക്തമാണെന്നത് ഞങ്ങളെ അത്ഭുതപ്പെടുത്തി. ടേൺഓവർ നിരക്കുകൾ സാധാരണയായി മൂന്നിലൊന്നായി കുറഞ്ഞു."
കാലാവസ്ഥാ വ്യതിയാനം കൂടുമ്പോൾ ടേൺഓവർ വർദ്ധിക്കുമെന്നോ അല്ലെങ്കിൽ അത് സ്ഥിരമായി നിൽക്കുമെന്നോ ആണ് പല ഗവേഷകരും പ്രതീക്ഷിച്ചിരുന്നത്. താപനില കൂടുമ്പോൾ ചില വർഗ്ഗങ്ങൾ അപ്രത്യക്ഷമാകുമെന്നും, പുതിയവ വേഗത്തിൽ ആ സ്ഥാനം പിടിച്ചെടുക്കുമെന്നും കരുതപ്പെട്ടിരുന്നു. എന്നാൽ പഠനം കാണിക്കുന്നത് മറിച്ചാണ്.
ആരോഗ്യകരമായ ആവാസവ്യവസ്ഥകൾ, പുതിയ ജീവവർഗ്ഗങ്ങളുടെ ഒരു വലിയ ശേഖരം തന്നെ നിലനിർത്താറുണ്ട്. ഇത് തുടർച്ചയായ ജീവവർഗ്ഗ മാറ്റം ഉറപ്പാക്കുകയും, അതുവഴി പ്രതിസന്ധികളെ അതിജീവിക്കാനുള്ള കരുത്ത് നൽകുകയും ചെയ്യുന്നു. എന്നാൽ ആവാസവ്യവസ്ഥയുടെ തകർച്ച, മലിനീകരണം, ഭൂമി തരംതിരിക്കൽ തുടങ്ങിയ മനുഷ്യനിർമ്മിത കാരണങ്ങൾ, ഈ ജീവവർഗ്ഗ ശേഖരത്തെ സാരമായി ബാധിച്ചു.
ഈ മാറ്റത്തിന്റെ വേഗത കുറയുന്നത്, ഭാവിയിലെ കാലാവസ്ഥാ വ്യതിയാനങ്ങളെ നേരിടാനുള്ള ആവാസവ്യവസ്ഥകളുടെ ശേഷിയെ ഇല്ലാതാക്കും. ഇത് പ്രകൃതിയുടെ സ്ഥിരതയല്ല, മറിച്ച് പരിസ്ഥിതി നാശത്തിന്റെ ലക്ഷണമാണെന്ന് ശാസ്ത്രജ്ഞർ മുന്നറിയിപ്പ് നൽകുന്നു. പ്രകൃതിയുടെ സ്വയം കേടുപാടുകൾ തീർക്കാനുള്ള കഴിവ് ദുർബലമാവുകയാണ്.
പഠനത്തിന് നേതൃത്വം നൽകിയ ഇമ്മാനുവൽ സി. നവാങ്ക്വോ വിശദീകരിച്ചു: "പ്രകൃതി എന്നത് സ്വയം കേടുപാടുകൾ തീർക്കുന്ന ഒരു യന്ത്രം പോലെയാണ്. അത് പഴയ ഭാഗങ്ങൾ മാറ്റി പുതിയവ സ്ഥാപിച്ചുകൊണ്ടേയിരിക്കും. എന്നാൽ ആ യന്ത്രം ഇപ്പോൾ സാവധാനം നിലച്ചുതുടങ്ങുകയാണ്."
1970-കൾ മുതലുള്ള കാലഘട്ടത്തിലാണ് ഈ പഠനം പ്രധാനമായും ശ്രദ്ധ കേന്ദ്രീകരിച്ചത്. പരിസ്ഥിതി മാറ്റങ്ങൾ വേഗത്തിലായ ഒരു നിശ്ചിത വർഷത്തിന് മുമ്പും ശേഷവുമുള്ള ടേൺഓവർ നിരക്കുകൾ 'BioTIME' എന്ന ഡാറ്റാബേസ് ഉപയോഗിച്ചാണ് ഗവേഷകർ താരതമ്യം ചെയ്തത്.
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)