പ്ലാസ്റ്റിക് കടലായ് ചെന്നൈ; സമുദ്രമലിനീകരണത്തിനെതിരെയുള്ള പോരാട്ടം

ഓരോ ദിവസവും ചെന്നൈയിൽ 6,000 ടണ്ണിലധികം മാലിന്യമാണ് ഉത്പാദിപ്പിക്കപ്പെടുന്നത്. ഇതിൽ ഭൂരിഭാഗവും ശേഖരിക്കപ്പെടുന്നില്ല. വലിയൊരു ഭാഗം മാലിന്യം തെരുവുകളിലേക്കും, അഴുക്കുചാലുകളിലേക്കും, നദികളിലേക്കും, ഒടുവിൽ കടലിലേക്കും ഒഴുകിയെത്തുന്നു.

ഇന്ത്യയിൽ ഏറ്റവും കൂടുതൽ മാലിന്യം ഉത്പാദിപ്പിക്കുന്ന തീരദേശ നഗരങ്ങളിലൊന്നായ ചെന്നൈ, വർദ്ധിച്ചുവരുന്ന സമുദ്ര മലിനീകരണ ഭീഷണി നേരിടുകയാണ്. നഗരത്തിലെ ജലാശയങ്ങളിലൂടെ - അഡയാർ, കൂവം, ബക്കിംഗ്ഹാം കനാൽ, മഴവെള്ള ഓടകൾ എന്നിവയുൾപ്പെടെ - പ്ലാസ്റ്റിക് മാലിന്യങ്ങൾ നേരിട്ട് ബംഗാൾ ഉൾക്കടലിലേക്ക് ഒഴുകുന്നു.

വർഷങ്ങളായുള്ള വെള്ളപ്പൊക്കം ഈ പ്രശ്നത്തിന്റെ വ്യാപ്തി വെളിപ്പെടുത്തിയിട്ടുണ്ട്; അതിശക്തമായ മഴയ്ക്ക് പിന്നാലെ ജലാശയങ്ങളിൽ നിന്ന് നൂറുകണക്കിന് ടൺ പ്ലാസ്റ്റിക് മാലിന്യമാണ് നീക്കം ചെയ്യുന്നത്. എന്നാൽ പ്ലാസ്റ്റിക് സമുദ്രത്തിൽ എത്തുന്നതിന് മുമ്പ് ഈ പ്രക്രിയ തടയാൻ നമുക്ക് കഴിയുമോ?

ഈ ചിത്രത്തിലൂടെ, റെസിഡന്റ്സ് ഓഫ് കസ്തൂർബ നഗർ അസോസിയേഷനുമായി സഹകരിച്ച് അർബൻ ഓഷ്യൻ പ്രോഗ്രാമിന് കീഴിൽ ആരംഭിച്ച 'വി സെഗ്രഗേറ്റ്' (We Segregate) എന്ന പൗര കൂട്ടായ്മയുടെ പ്രവർത്തനം ഞങ്ങൾ പരിശോധിക്കുന്നു. മാലിന്യ സംസ്കരണ സംവിധാനത്തിൽ നിന്ന് പുറന്തള്ളപ്പെടുന്നതിന് മുമ്പ്, സമുദ്ര മലിനീകരണം തടയുക എന്ന ലക്ഷ്യത്തോടെ സോഫ്റ്റ് പ്ലാസ്റ്റിക്കുകൾ സ്രോതസ്സിൽ തന്നെ തരംതിരിക്കാനും ശേഖരിക്കാനുമാണ് ഈ പദ്ധതി ശ്രദ്ധ കേന്ദ്രീകരിക്കുന്നത്.

ഇത് വലിയൊരു ചോദ്യം കൂടി ഉയർത്തുന്നു: പ്ലാസ്റ്റിക് മാലിന്യങ്ങൾ കൈകാര്യം ചെയ്യാനുള്ള ഉത്തരവാദിത്തം പൗരന്മാരിൽ മാത്രം ഒതുങ്ങേണ്ടതാണോ, അതോ പാക്കേജിംഗ് കമ്പനികളും നിർമ്മാതാക്കളും ഇതിന് ഉത്തരവാദികളാകേണ്ടതുണ്ടോ?

(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)