ചന്ദ്രനിൽ തകർന്നു വീഴുന്ന സ്പേസ് എക്സ് റോക്കറ്റ് ഭാഗം തത്സമയം നിരീക്ഷിക്കാൻ നാസ

2026 ഓഗസ്റ്റ് 5-ന് ഉപേക്ഷിക്കപ്പെട്ട ഒരു സ്പേസ് എക്സ് റോക്കറ്റ് ഭാഗം ചന്ദ്രനിൽ കൂട്ടിയിടിക്കുന്നത് നിരീക്ഷിക്കാൻ ശ്രമിക്കുമെന്ന് നാസ അറിയിച്ചു. മുൻകൂട്ടി ആസൂത്രണം ചെയ്യാത്ത ഈ കൂട്ടിയിടിക്കൽ ഭൂമിക്ക് യാതൊരു ഭീഷണിയും ഉയർത്തുന്നില്ലെങ്കിലും ശാസ്ത്രജ്ഞർക്ക് സുപ്രധാന ലൂണാർ വിവരങ്ങൾ നൽകിയേക്കും.

ഫോൾക്കൺ 9 റോക്കറ്റിന്റെ ഉപയോഗിച്ച ഉപരിതല ഭാഗം ('സ്റ്റേജ്') ചന്ദ്രോപരിതലത്തിലെ 'ഐൻസ്റ്റീൻ', 'ബെൽ' ഗർത്തങ്ങൾക്ക് സമീപമാണ് പതിക്കുകയെന്ന് നാസ വ്യക്തമാക്കുന്നു. ഈ കൂട്ടിയിടി മൂലം ഏകദേശം 60 അടി വീതിയും 12 അടി ആഴവുമുള്ള പുതിയൊരു ഗർത്തം രൂപപ്പെടാനും പൊടിയും പാറക്കഷ്ണങ്ങളും പുറത്തേക്ക് തെറിക്കാനും സാധ്യതയുണ്ട്, നാസ പറഞ്ഞു.

നാസയുടെ 'കോമേഴ്‌സ്യൽ ലൂണാർ പേലോഡ് സർവീസസ്' പദ്ധതിയുടെ ഭാഗമായി ഫയർഫ്ലൈ എയറോസ്‌പേസിന്റെ 'ബ്ലൂ ഗോസ്റ്റ് 1' ലൂണാർ ലാൻഡർ വിജയകരമായി വിക്ഷേപിച്ച 2025 ജനുവരി 15-നാണ് ഈ റോക്കറ്റ് ഘടകം ബഹിരാകാശത്തേക്ക് അയച്ചതെന്ന് നാസ അറിയിച്ചു. പിന്നീട് സൗരപ്രവർത്തനങ്ങളും ഗുരുത്വാകർഷണ ബലങ്ങളും കാരണം ഇത് ആസൂത്രിതമല്ലാത്ത പാതയിലൂടെ ചന്ദ്രനിലേക്ക് തിരിയുകയായിരുന്നു.

പൊതു ലഭ്യമായ വിവരങ്ങൾ ഉപയോഗിച്ച് സ്വതന്ത്ര ജ്യോതിശാസ്ത്രജ്ഞരാണ് ഈ പാത ആദ്യം കണ്ടെത്തിയത്. തുടർന്ന് നാസയുടെ ജെറ്റ് പ്രൊപ്പൽഷൻ ലബോറട്ടറിയിലുള്ള 'സെന്റർ ഫോർ നിയർ എർത്ത് ഒബ്‌ജക്റ്റ് സ്റ്റഡീസ്' ഈ റോക്കറ്റ് ഭാഗം ചന്ദ്രനിൽ പതിക്കാൻ 100 ശതമാനം സാധ്യതയുണ്ടെന്ന് സ്ഥിരീകരിച്ചു.

ഏകദേശം ഒരു സ്‌കൂൾ ബസിന്റെ വലുപ്പമുള്ളതും നാല് ടൺ ഭാരമുള്ളതുമായ ഈ വസ്തു മണിക്കൂറിൽ 5,400 മൈൽ വേഗതയിലാണ് ചന്ദ്രനിൽ കൂട്ടിയിടിക്കുകയെന്ന് ദി ഗാർഡിയൻ റിപ്പോർട്ട് ചെയ്യുന്നു. ഗ്രീനിച്ച് സമയം രാവിലെ 06:35-ഓടെ (ഇന്ത്യൻ സമയം ഉച്ചയ്ക്ക് ഏകദേശം 1 മണിക്ക്) കൂട്ടിയിടി നടക്കുമെന്ന് ബിബിസി റിപ്പോർട്ട് വ്യക്തമാക്കുന്നു.

ശാസ്ത്രീയ സാധ്യതകളും ബഹിരാകാശ അവശിഷ്ടങ്ങളെക്കുറിച്ചുള്ള ആശങ്കകളും

ഈ കൂട്ടിയിടിക്കൽ ഭൂമിയിൽ നിന്ന് നഗ്നനേത്രങ്ങൾ കൊണ്ട് കാണാനാകില്ല, എങ്കിലും തത്സമയം ഗ്രൗണ്ട് ടെലിസ്‌കോപ്പുകൾ ഉപയോഗിച്ച് നിരീക്ഷിക്കാൻ ശ്രമിക്കുമെന്ന് നാസ പറഞ്ഞു. എന്നാൽ കാലാവസ്ഥയും വെളിച്ചത്തിന്റെ കുറവും നിരീക്ഷണത്തിന് തടസ്സമായേക്കാമെന്നും നാസ വ്യക്തമാക്കി.

നാസയുടെ 'ലൂണാർ റീകണസൻസ് ഓർബിറ്ററും' ദക്ഷിണ കൊറിയയുടെ 'കൊറിയ പാത്ത്‌ഫൈൻഡർ ലൂണാർ ഓർബിറ്ററി'ലുള്ള 'ഷാഡോക്യാം' ഉപകരണവും കൂട്ടിയിടിക്ക് മുമ്പും ശേഷവുമുള്ള ചിത്രങ്ങൾ പകർക്കാൻ ശ്രമിക്കുമെന്ന് നാസ പറഞ്ഞു. ചിത്രങ്ങൾ ലഭ്യമാകുന്നത് വെളിച്ചം, ഭ്രമണപഥ സമയം, പേടകത്തിന്റെ സ്ഥാനം എന്നിവയെ ആശ്രയിച്ചിരിക്കുന്നതിനാൽ ഇവ ലഭിക്കാൻ ദിവസങ്ങളെടുത്തേക്കാം.

ചന്ദ്രനിൽ വസ്തുക്കൾ പതിക്കുമ്പോൾ ഉപരിതലത്തിലെ വസ്തുക്കൾ എങ്ങനെ തെറിച്ചുപോകുന്നുവെന്ന് പഠിക്കാനും ഭാവിയിലെ ബഹിരാകാശ ദൗത്യങ്ങൾക്കുള്ള മാതൃകകൾ മെച്ചപ്പെടുത്താനും ഇത് സഹായിക്കുമെന്ന് ശാസ്ത്രജ്ഞർ കരുതുന്നതായി നാസ പറഞ്ഞു. ചന്ദ്രന് അന്തരീക്ഷമില്ലാത്തതിനാൽ വസ്തുക്കളുടെ വേഗത കുറയുന്നില്ല, അതിനാൽ ദിവസേന നിരവധി ഉൽക്കാപാതങ്ങൾ അവിടെ സംഭവിക്കാറുണ്ട്.

മനുഷ്യനിർമ്മിത വസ്തുക്കൾ ചന്ദ്രനിൽ പതിക്കുന്നത് അപൂർവ്വമാണെങ്കിലും മുൻപും സംഭവിച്ചിട്ടുണ്ട്. 2022-ൽ ഒരു ചൈനീസ് റോക്കറ്റ് ഭാഗം ചന്ദ്രന്റെ പിൻഭാഗത്ത് പതിച്ചിരുന്നു. എന്നാൽ 2009-ൽ ഉയർന്നുവരുന്ന പൊടിപടലങ്ങൾ പഠിക്കാനായി നാസ മനഃപൂർവ്വം ഒരു റോക്കറ്റ് ഭാഗം ചന്ദ്രനിൽ ഇടിച്ചിറക്കുകയായിരുന്നുവെന്ന് ദി ഗാർഡിയൻ റിപ്പോർട്ട് ചെയ്തു.

നിയന്ത്രിതമായ കൂട്ടിയിടിക്കൽ ഉപഗ്രഹങ്ങളുടെ കാലാവധി സുരക്ഷിതമായി അവസാനിപ്പിക്കാൻ സഹായിക്കുമെന്നതിനാൽ, ചില ദൗത്യങ്ങളിൽ റോക്കറ്റിന്റെ ഉപരിതല ഭാഗങ്ങൾ ചന്ദ്രോപരിതലത്തിൽ തള്ളുന്നത് സാങ്കേതികമായി അംഗീകരിക്കപ്പെട്ട രീതിയാണെന്ന് നാസ പറഞ്ഞു.

എന്നാൽ ഈ സംഭവം ബഹിരാകാശ അവശിഷ്ടങ്ങളെക്കുറിച്ചുള്ള ആശങ്കകൾ വർദ്ധിപ്പിക്കുന്നുവെന്ന് ബഹിരാകാശ ശാസ്ത്രജ്ഞർ ചൂണ്ടിക്കാണിക്കുന്നു. റോക്കറ്റിന്റെ പാതയെക്കുറിച്ച് റിപ്പോർട്ട് പ്രസിദ്ധീകരിച്ച ബിൽ ഗ്രേ എന്ന ബഹിരാകാശ ശാസ്ത്രജ്ഞൻ പറയുന്നതനുസരിച്ച്, ഈ കൂട്ടിയിടിക്ക് ചെറിയ ശാസ്ത്രീയ പ്രാധാന്യമേയുള്ളൂ എന്നും ഇത് ഉപയോഗശൂന്യമായ ബഹിരാകാശ ഉപകരണങ്ങൾ കൈകാര്യം ചെയ്യുന്നതിലെ "അശ്രദ്ധയെ" വെളിപ്പെടുത്തുന്നുവെന്നും ദി ഗാർഡിയൻ റിപ്പോർട്ടിൽ പറയുന്നു.

ഭൂമിയെയും അതിന്റെ ഭ്രമണപഥത്തെയും മറ്റ് ബഹിരാകാശ വസ്തുക്കളെയും സംരക്ഷിക്കുന്നതിനായി അവശിഷ്ടങ്ങൾ കുറയ്ക്കുന്നതിനും ഉത്തരവാദിത്തമുള്ള രീതിയിൽ അവ നീക്കം ചെയ്യുന്നതിനും തങ്ങൾ പ്രതിജ്ഞാബദ്ധരാണെന്ന് നാസ വ്യക്തമാക്കി.

(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)