കഴിഞ്ഞ 28 വർഷങ്ങളായി ലോകമെമ്പാടുമുള്ള വനിതാ ഗവേഷകരെ ആദരിക്കുന്നതിനായി ഏർപ്പെടുത്തിയ ലോറിയൽ-യുനെസ്കോ 'ഫോർ വുമൺ ഇൻ സയൻസ്' അന്താരാഷ്ട്രപുരസ്കാരങ്ങളുടെ 2026 ലെ ജേതാക്കളായി അഞ്ച് വനിതാ ശാസ്ത്രജ്ഞരെ പ്രഖ്യാപിച്ചു.
2026 മേയ് 19-ന് ഫ്രാൻസിലെ പാരീസിൽ പ്രഖ്യാപിച്ച ഈ പുരസ്കാരങ്ങൾ 2026 ജൂൺ 11-ന് യുനെസ്കോ ആസ്ഥാനത്ത് നടക്കുന്ന ചടങ്ങിൽ വെച്ച് സമ്മാനിക്കും. ഹൃദയാരോഗ്യ സംരക്ഷണം, ന്യൂട്രീഷണൽ സൈക്യാട്രി, സിംഗിൾ-സെൽ ബയോളജി, അഗ്രികൾച്ചറൽ ബയോടെക്നോളജി, ടിഷ്യൂ എൻജിനീയറിങ് എന്നിവയുൾപ്പെടെയുള്ള ലൈഫ് ആൻഡ് എൻവയോൺമെന്റൽ സയൻസസ് (ജീവശാസ്ത്ര-പരിസ്ഥിതി ശാസ്ത്ര മേഖലകൾ) പ്രവൃത്തികൾക്കാണ് ഈ വർഷത്തെ ജേതാക്കൾക്ക് പുരസ്കാരം ലഭിച്ചത്.
2026-ലെ പുരസ്കാരത്തിനായി 89 രാജ്യങ്ങളിൽ നിന്നായി റെക്കോർഡ് എണ്ണമായ 504 നാമനിർദ്ദേശങ്ങൾ ലഭിച്ചതായി യുനെസ്കോയും ഫൗണ്ടേഷൻ ലോറിയലും അറിയിച്ചു. ഈ അഞ്ച് വിജയികൾ കൂടി ഉൾപ്പെടുന്നതോടെ, പരിപാടി തുടങ്ങിയത് മുതൽ ഇതുവരെ ആദരിക്കപ്പെട്ട അയ്യായിരത്തിലധികം വനിതാ ഗവേഷകരുടെ നിരയിലേക്ക് ഇവരും ചേരും. ഈ അന്താരാഷ്ട്ര പുരസ്കാരം ഇതുവരെ 142 പേരെ ആദരിച്ചിട്ടുണ്ട്, ഇതിൽ ഏഴ് പേർക്ക് പിന്നീട് ശാസ്ത്രത്തിനുള്ള നോബൽ സമ്മാനം ലഭിച്ചിട്ടുണ്ട്.
ഫ്രാൻസിലെ നാഷണൽ ഇൻസ്റ്റിറ്റ്യൂട്ട് ഫോർ ഹെൽത്ത് ആൻഡ് മെഡിക്കൽ റിസർച്ചിലെ റിസർച്ച് ഡയറക്ടർ എമിരറ്റസും ഈ പുരസ്കാരത്തിന്റെ മുൻ ജേതാവുമായ പ്രൊഫസർ ബ്രിജിറ്റ് എൽ കീഫർ അധ്യക്ഷയായ സ്വതന്ത്ര അന്താരാഷ്ട്ര ജൂറിയാണ് ജേതാക്കളെ തിരഞ്ഞെടുത്തത്.
കേപ് ടൗൺ സർവകലാശാലയിലെ പ്രൊഫസറും സൗത്ത് ആഫ്രിക്കൻ മെഡിക്കൽ റിസർച്ച് കൗൺസിൽ വൈസ് പ്രസിഡന്റുമായ പ്രൊഫസർ ലീസ്ൽ സുൽകെ ആഫ്രിക്ക, അറബ് രാജ്യങ്ങൾ എന്നീ മേഖലകളിൽ നിന്നുള്ള ജേതാവായി തിരഞ്ഞെടുക്കപ്പെട്ടു. ദരിദ്ര സാഹചര്യങ്ങളിൽ ജീവിക്കുന്ന കുട്ടികളെ വലിയ തോതിൽ ബാധിക്കുന്ന റുമാറ്റിക് ഹൃദ്രോഗം ഉൾപ്പെടെയുള്ള ഹൃദയസംബന്ധമായ അസുഖങ്ങളുള്ള കുട്ടികളുടെ ചികിത്സ മെച്ചപ്പെടുത്തുന്നതിനുള്ള പ്രവർത്തനങ്ങൾക്കാണ് അവർക്ക് ഈ അംഗീകാരം ലഭിച്ചത്.
ഏഷ്യാ പസഫിക് മേഖലയിലെ പുരസ്കാരം ഓസ്ട്രേലിയയിലെ ഡീക്കിൻ സർവകലാശാലയിലെ 'ഫുഡ് ആൻഡ് മൂഡ് സെന്റർ' ഡയറക്ടറും ഡീക്കിൻ ഡിസ്റ്റിംഗുഷ്ഡ് പ്രൊഫസറുമായ ഫെലിസ് ജാക്കയ്ക്കാണ് ലഭിച്ചത്. ഭക്ഷണക്രമം, മസ്തിഷ്ക ആരോഗ്യം, മാനസികാരോഗ്യം എന്നിവ തമ്മിലുള്ള ബന്ധത്തെക്കുറിച്ച് പഠിക്കുന്ന 'ന്യൂട്രീഷണൽ സൈക്യാട്രി' എന്ന മേഖല രൂപപ്പെടുത്താൻ സഹായിച്ചതിനാണ് അവർ ആദരിക്കപ്പെട്ടത്.
കേംബ്രിഡ്ജ് സർവകലാശാലയിലെ സ്റ്റെം സെൽ മെഡിസിൻ ചെയർ പ്രൊഫസറായ സാറാ എ ടെയ്ച്മാൻ യൂറോപ്പ് മേഖലയിൽ നിന്നുള്ള ജേതാവായി തിരഞ്ഞെടുക്കപ്പെട്ടു. മനുഷ്യശരീരത്തെ കോശങ്ങളുടെ തലത്തിൽ (single-cell resolution) മനസ്സിലാക്കുന്നതിനായി ജീനോം ശാസ്ത്രവും കമ്പ്യൂട്ടേഷണൽ ബയോളജിയും ഉപയോഗപ്പെടുത്തുന്നതാണ് ഇവരുടെ പ്രവർത്തനം. ഇത് ബയോമെഡിക്കൽ ഗവേഷണങ്ങൾക്കും മരുന്ന് കണ്ടെത്തലുകൾക്കുമുള്ള സുപ്രധാന വിവരങ്ങൾ നൽകുന്നു.
ലാറ്റിൻ അമേരിക്ക, കരീബിയൻ മേഖലകളിൽ നിന്നുള്ള പുരസ്കാരം അർജന്റീനയിലെ കോണിസെറ്റിലെ (CONICET) സീനിയർ ഗവേഷകയും നാഷണൽ യൂണിവേഴ്സിറ്റി ഓഫ് ലിറ്ററലിലെ പ്രൊഫസറുമായ റാക്വൽ ലിയ ചാനാണ് ലഭിച്ചത്. സസ്യ ജീവശാസ്ത്ര ഗവേഷണങ്ങളെ അടിസ്ഥാനമാക്കി വരൾച്ചയെ പ്രതിരോധിക്കുന്ന തരത്തിലുള്ള ഗോതമ്പ്, ചോളം, നെല്ല്, സോയാബീൻ എന്നിവയുടെ പുതിയ ഇനങ്ങൾ വികസിപ്പിച്ചെടുത്തതിനാണ് അവർക്ക് ഈ അംഗീകാരം ലഭിച്ചത്.
അമേരിക്കയിലെ കൊളംബിയ സർവകലാശാലയിലെ ബയോമെഡിക്കൽ എൻജിനീയറിങ് പ്രൊഫസറായ ഗോർഡാന വുഞ്ചാക്-നൊവാകോവിച്ച് വടക്കേ അമേരിക്കൻ മേഖലയിലെ ജേതാവായി തിരഞ്ഞെടുക്കപ്പെട്ടു. ടിഷ്യൂ എൻജിനീയറിങ്, റീജനറേറ്റീവ് മെഡിസിൻ എന്നീ മേഖലകളിലെ പ്രവർത്തനങ്ങൾക്കും, കൃത്രിമമായി അവയവങ്ങളുടെ ഘടന ലബോറട്ടറിയിൽ പുനഃസൃഷ്ടിക്കുന്ന "ഓർഗൻസ്-ഓൺ-എ-ചിപ്പ്" (organs-on-a-chip) സാങ്കേതികവിദ്യ വികസിപ്പിച്ചതിനുമാണ് അവർ ആദരിക്കപ്പെട്ടത്.
യുനെസ്കോയും ഫൗണ്ടേഷൻ ലോറിയലും തങ്ങളുടെ പങ്കാളിത്തം അടുത്ത ആറ് വർഷത്തേക്ക് കൂടി പുതുക്കിയ സാഹചര്യത്തിലാണ് ഈ പ്രഖ്യാപനം വന്നിരിക്കുന്നത്. ഈ പങ്കാളിത്തം 140-ലധികം രാജ്യങ്ങളിലും പ്രദേശങ്ങളിലുമുള്ള പെൺകുട്ടികളെയും സ്ത്രീകളെയും അവരുടെ ശാസ്ത്രീയ ഔദ്യോഗിക ജീവിതത്തിന്റെ വിവിധ ഘട്ടങ്ങളിൽ - അതായത് സ്കൂൾ തലത്തിലുള്ള പദ്ധതികൾ മുതൽ യുവ ഗവേഷകർക്കായുള്ള പ്രോഗ്രാമുകൾ വരെ - പിന്തുണയ്ക്കാൻ സഹായിക്കുമെന്ന് ഇരു സംഘടനകളും വ്യക്തമാക്കി.
ആഗോളതലത്തിൽ ഗവേഷകരിൽ മൂന്നിലൊന്ന് (ശതമാനക്കണക്കിൽ 33%) മാത്രമാണ് ഇപ്പോഴും സ്ത്രീകളുള്ളതെന്ന് യുനെസ്കോ ചൂണ്ടിക്കാണിച്ചു. ഈ ലിംഗവിവേചനം ശാസ്ത്രരംഗത്തെ വൈവിധ്യത്തെ പരിമിതപ്പെടുത്തുമെന്നും, പ്രധാനപ്പെട്ട ആഗോള വെല്ലുവിളികളെ നേരിടാൻ ആവശ്യമായ കാഴ്ചപ്പാടുകളെ ഇല്ലാതാക്കുമെന്നും അവർ മുന്നറിയിപ്പ് നൽകി.
ശാസ്ത്രരംഗത്ത് സ്ത്രീകളുടെ സ്ഥാനം സംരക്ഷിക്കുന്നതിനായി ഈ പ്രോഗ്രാം "എപ്പോഴത്തേക്കാളും കൂടുതൽ സജീവമായി രംഗത്തുണ്ട്" എന്ന് ഫൗണ്ടേഷൻ ലോറിയൽ പ്രസിഡന്റ് ജീൻ-പോൾ അഗോൺ പറഞ്ഞു.
വനിതാ ശാസ്ത്രജ്ഞർ "നമ്മുടെ ചിന്തകൾക്കും അപ്പുറത്തുള്ള കാര്യങ്ങളാണ് സാധ്യമാക്കിക്കൊണ്ടിരിക്കുന്നത്" എന്ന് യുനെസ്കോ ഡയറക്ടർ ജനറൽ ഖാലിദ് അൽ-ഇനാനി പറഞ്ഞു. മാനവികതയുടെ പകുതിയോളം വരുന്ന പ്രതിഭകളെ മാറ്റിനിർത്താൻ ശാസ്ത്രത്തിന് കഴിയില്ലെന്നും അദ്ദേഹം കൂട്ടിച്ചേർത്തു.
(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)