ഭാവിയെക്കുറിച്ച് പ്രതീക്ഷ, കുടുംബത്തെപ്പറ്റി അനിശ്ചിതത്വം; യുഎൻഎഫ്പിഎ സർവേയിൽ ഇന്ത്യയിലെ യുവാക്കൾ പറയുന്നത്

ഭാവി കൂടുതൽ പ്രതീക്ഷ നൽകുന്നതാണെന്ന് ഇന്ത്യയിലെ യുവാക്കൾ കരുതുന്നുണ്ടെങ്കിലും, സാമ്പത്തിക സമ്മർദ്ദങ്ങൾ അവർ ആഗ്രഹിക്കുന്ന തരത്തിലുള്ള കുടുംബജീവിതവും അവർക്ക് കെട്ടിപ്പടുക്കാൻ സാധിക്കുന്ന യാഥാർത്ഥ്യവും തമ്മിലുള്ള വ്യത്യാസം വർദ്ധിപ്പിക്കുന്നതായി ഐക്യരാഷ്ട്ര ജനസംഖ്യാ ഫണ്ടിന്റെ (UNFPA) പുതിയ സർവേ വ്യക്തമാക്കുന്നു.

ഇന്ത്യൻ ചരിത്രത്തിലെ ഏറ്റവും നിർണ്ണായകമായ ജനസംഖ്യാപരമായ മാറ്റങ്ങളിലൂടെ രാജ്യം കടന്നുപോകുന്ന പശ്ചാത്തലത്തിൽ പുറത്തുവന്ന ഈ സർവേ പ്രകാരം, പത്തിൽ എട്ട് ഇന്ത്യൻ യുവാക്കളും തങ്ങളുടെ ഭാവിയെക്കുറിച്ച് ശുഭപ്രതീക്ഷയുള്ളവരാണെന്ന് വ്യക്തമാക്കുന്നു.

ലോക ജനസംഖ്യാ ദിനമായ ജൂലൈ 11 നോടനുബന്ധിച്ചാണ് യുഎൻഎഫ്പിഎയുടെ 'ഡെമോഗ്രാഫിക് ഫ്യൂച്ചേഴ്സ് സർവേ'യിൽ നിന്നുള്ള ഈ കണ്ടെത്തലുകൾ പുറത്തുവിട്ടത്. ആഗോളതലത്തിൽ ഇന്റർനെറ്റ് സൗകര്യമുള്ള, 18 നും 39 നും ഇടയിൽ പ്രായമുള്ള ഒരു ലക്ഷം മുതിർന്നവരിൽ നിന്നാണ് സർവേ വിവരങ്ങൾ ശേഖരിച്ചത്. ഇതിൽ 1,700-ലധികം ഇന്ത്യൻ പ്രതികരണങ്ങളും ഉൾപ്പെടുന്നു.

ഈ സർവേ രാജ്യത്തെ മൊത്തത്തിലുള്ള ജനസംഖ്യാ പ്രാതിനിധ്യം കാണിക്കുന്ന ഒന്നല്ലെന്നും, അതിനാൽ ഇതിനെ ദേശീയതലത്തിലുള്ള ഒരു പൊതു വിലയിരുത്തലായി കണക്കാക്കരുതെന്നും യുഎൻഎഫ്പിഎ വ്യക്തമാക്കിയിട്ടുണ്ട്. ലിംഗഭേദം, പ്രായം, വിദ്യാഭ്യാസം എന്നിവയുടെ അടിസ്ഥാനത്തിലാണ് സർവേയിലെ പ്രതികരണങ്ങൾ ക്രമീകരിച്ചിരിക്കുന്നത്.

ഇന്ത്യയിൽ നിന്നുള്ള കണ്ടെത്തലുകൾ പ്രകാരം, സർവേയിൽ പങ്കെടുത്തവരിൽ 83 ശതമാനത്തോളം പേരും ഭാവിയെക്കുറിച്ച് "വളരെ നല്ല അല്ലെങ്കിൽ നല്ല" പ്രതീക്ഷ പങ്കുവെച്ചു. അതേസമയം തന്നെ, പകുതിയോളം പേർ (47 ശതമാനം) "സംഘർഷങ്ങൾ, സാമ്പത്തിക അരക്ഷിതാവസ്ഥ, അസമത്വം" എന്നിവയെക്കുറിച്ച് കടുത്ത ആശങ്കയുള്ളവരാണെന്നും വ്യക്തമാക്കി.

പ്രതീക്ഷകളും യാഥാർത്ഥ്യവും തമ്മിലുള്ള അന്തരം

കുടുംബത്തിന്റെ വലിപ്പത്തെക്കുറിച്ച് യുവാക്കളുടെ ആഗ്രഹങ്ങളും അവരുടെ ജീവിത യാഥാർത്ഥ്യങ്ങളും തമ്മിൽ വലിയൊരു അന്തരമുണ്ടെന്ന് സർവേ ചൂണ്ടിക്കാണിക്കുന്നു. 18-നും 39-നും ഇടയിൽ പ്രായമുള്ള സ്ത്രീകൾ തങ്ങളുടെ ആഗ്രഹപ്രകാരമുള്ള കുടുംബത്തിൽ 2.1 കുട്ടികൾ വേണമെന്ന് വ്യക്തമാക്കിയപ്പോൾ, 35-നും 39-നും ഇടയിൽ പ്രായമുള്ള സ്ത്രീകളുടെ പക്കലുള്ള ശരാശരി കുട്ടികളുടെ എണ്ണം വെറും 1 മാത്രമാണ്. പുരുഷന്മാരിൽ ഇത് യഥാക്രമം 2.2 കുട്ടികളെന്ന ആഗ്രഹവും, യാഥാർത്ഥ്യത്തിൽ അത് ശരാശരി 1.1 കുട്ടികളുമായി ചുരുങ്ങുന്നതായും കണ്ടെത്തി.

ഈ വലിയ അന്തരം നിലനിൽക്കുമ്പോഴും, മാതൃത്വവും പിതൃത്വവും ഇപ്പോഴും ഇന്ത്യൻ യുവാക്കളുടെ ഭാവി പദ്ധതികളുടെ ഭാഗമാണ്. നിലവിൽ കുട്ടികളില്ലാത്ത 35 നും 39 നും ഇടയിൽ പ്രായമുള്ളവരിൽ 85 ശതമാനത്തോളം പേരും ഭാവിയിൽ മാതാപിതാക്കളാകാൻ ആഗ്രഹിക്കുന്നവരാണ്.

ഇന്ത്യയുടെ ജനനനിരക്ക് റീപ്ലേസ്‌മെന്റ് നിരക്കിനേക്കാൾ താഴേക്ക് പോയ സാഹചര്യത്തിലാണ് ഈ സർവേ ഫലങ്ങൾ പുറത്തുവരുന്നത്. രജിസ്ട്രാർ ജനറൽ ആന്റ് സെൻസസ് കമ്മീഷണറുടെ ഓഫീസ് കഴിഞ്ഞ മാസം പുറത്തുവിട്ട സാമ്പിൾ രജിസ്ട്രേഷൻ സിസ്റ്റം സ്റ്റാറ്റിസ്റ്റിക്കൽ റിപ്പോർട്ട് പ്രകാരം, ഇന്ത്യയുടെ ആകെ ജനനനിരക്ക് ഒരു സ്ത്രീക്ക് 1.9 കുട്ടികൾ എന്ന തോതിലേക്ക് താഴ്ന്നിട്ടുണ്ട്. ഇത് ജനസംഖ്യ ദീർഘകാലത്തേക്ക് സ്ഥിരമായി നിലനിർത്താൻ ആവശ്യമായ 2.1 എന്ന നിരക്കിനേക്കാൾ താഴെയാണ്. 2000-കളിൽ ഇന്ത്യയിലെ ജനനനിരക്ക് ഒരു സ്ത്രീക്ക് ശരാശരി 3.3 കുട്ടികൾ എന്ന നിലയിലായിരുന്നു.

ഒരു സ്ത്രീ തന്റെ ജീവിതകാലത്ത് പ്രസവിക്കാൻ സാധ്യതയുള്ള കുട്ടികളുടെ ശരാശരി എണ്ണത്തെയാണ് ആകെ ജനനനിരക്ക് (Total Fertility Rate) എന്നത് കൊണ്ട് അർത്ഥമാക്കുന്നത്.

"ജനസംഖ്യ എന്നത് വെറും അക്കങ്ങളല്ല, മറിച്ച് അത് മനുഷ്യരെയും അവരുടെ ജീവിതത്തെയും അവരുടെ പ്രതീക്ഷകളെയും കുറിച്ചുള്ളതാണെന്ന് ലോക ജനസംഖ്യാ ദിനം നമ്മെ ഓർമ്മിപ്പിക്കുന്നു," യുഎൻഎഫ്പിഎ ഇന്ത്യ പ്രതിനിധി ആൻഡ്രിയ എം. വോജ്നർ പറഞ്ഞു.

"തങ്ങളുടെ ഭാവിയെക്കുറിച്ച് പ്രതീക്ഷയുള്ളവരാണെന്നാണ് ഇന്ത്യയിലുടനീളമുള്ള യുവാക്കൾ നമ്മളോട് പറയുന്നത്. ആ പ്രതീക്ഷകൾക്ക് അനുയോജ്യമായ അവസരങ്ങൾ അവർക്ക് ഉറപ്പാക്കുക എന്നത് നമ്മുടെ ഉത്തരവാദിത്തമാണ്. യുവാക്കൾക്ക് വിദ്യാഭ്യാസം പൂർത്തിയാക്കാനും, മികച്ച ആരോഗ്യപരിപാലനം ലഭ്യമാക്കാനും, മാന്യമായ തൊഴിൽ കണ്ടെത്താനും, വിവേചനമില്ലാതെ ജീവിക്കാനും, അവരുടെ അവകാശങ്ങളും തിരഞ്ഞെടുപ്പുകളും വിനിയോഗിക്കാനും സാധിക്കുമ്പോൾ അവർ ആഗ്രഹിക്കുന്ന ജീവിതം കെട്ടിപ്പടുക്കാൻ അവർക്ക് കൂടുതൽ കരുത്ത് ലഭിക്കുന്നു. അത് കുടുംബങ്ങളെയും സമൂഹങ്ങളെയും ഇന്ത്യയുടെ ഭാവിയെയും ശക്തിപ്പെടുത്തും," വോജ്നർ കൂട്ടിച്ചേർത്തു.

തീരുമാനങ്ങളെ സ്വാധീനിക്കുന്ന സാമ്പത്തിക ഭദ്രത

ഇന്ത്യൻ യുവാക്കളുടെ ഈ നിലപാടുകൾ സർവേയിൽ കണ്ടെത്തിയ ആഗോള പ്രവണതകളുമായി പൊരുത്തപ്പെടുന്നതാണ്. മൊത്തത്തിലുള്ള സാമ്പിളുകൾ പരിശോധിക്കുമ്പോൾ, വിവാഹം ഇപ്പോഴും ഒരു പൊതുവായ ആഗ്രഹമായി തുടരുന്നു. സർവേയിൽ പങ്കെടുത്തവരിൽ മൂന്നിൽ രണ്ട് ഭാഗത്തിലധികം ആളുകളും വിവാഹജീവിതം ഉൾപ്പെടുന്ന പങ്കാളിത്തമാണ് മികച്ചതെന്ന് തിരഞ്ഞെടുത്തു.

പങ്കാളിയെ തിരഞ്ഞെടുക്കുന്നതിൽ ഏറ്റവും പ്രധാനപ്പെട്ട ഘടകമായി ആഗോളതലത്തിൽ ഉയർന്നുവന്നത് സാമ്പത്തിക സുരക്ഷിതത്വമാണ് (81 ശതമാനം പേർ ഇത് പ്രധാനമാണെന്ന് പറഞ്ഞു). എന്നാൽ പങ്കാളിത്തത്തിനും മാതാപിതാക്കളാകുന്നതിനും ഏറ്റവും വലിയ തടസ്സമായി മാറിയതും സാമ്പത്തിക പ്രശ്നങ്ങളും പാർപ്പിട പരിമിതികളുമാണ്.

ആഗോളതലത്തിൽ മിക്ക പ്രദേശങ്ങളിലും രണ്ട് കുട്ടികളെന്നതാണ് ഏറ്റവും അനുയോജ്യമായ കുടുംബ വലുപ്പമായി ഭൂരിഭാഗം പേരും തിരഞ്ഞെടുത്തത്. എങ്കിലും 35 നും 39 നും ഇടയിൽ പ്രായമുള്ളവർക്ക് തങ്ങൾ ആഗ്രഹിച്ചതിനേക്കാൾ കുറഞ്ഞ കുട്ടികൾ മാത്രമാണ് യഥാർത്ഥത്തിൽ ഉള്ളത്.

ഇന്ത്യയുടെ ഏറ്റവും വലിയ ജനസംഖ്യാപരമായ സാധ്യത അതിന്റെ ജനസംഖ്യയുടെ വലിപ്പത്തിലല്ല, മറിച്ച് അവിടുത്തെ യുവാക്കളുടെ കഴിവുകളിലാണ് അടങ്ങിയിരിക്കുന്നതെന്ന് റിപ്പോർട്ട് എടുത്തുപറയുന്നു. ഈ കഴിവുകൾ പൂർണ്ണമായി പ്രയോജനപ്പെടുത്തണമെങ്കിൽ ഗുണനിലവാരമുള്ള വിദ്യാഭ്യാസം, മാന്യമായ ജോലി, ലഭ്യമായ ആരോഗ്യപരിപാലനം, സാമൂഹിക സുരക്ഷ, ലിംഗസമത്വം എന്നിവയിലൂടെ യുവാക്കൾക്കും യുവതികൾക്കും കൂടുതൽ അവസരങ്ങൾ വ്യാപിപ്പിക്കേണ്ടതുണ്ട്.

ഈ സാധ്യതകൾ തുറന്നു നൽകാൻ ഇന്ത്യക്ക് ഒരു "ലിംഗ ലാഭവിഹിതം" (gender dividend) ആവശ്യമാണ്. അതിലൂടെ ഓരോ യുവതിക്കും സ്വന്തം ഭാവിയും രാജ്യത്തിന്റെ വികസനവും തുല്യമായി രൂപപ്പെടുത്തുന്നതിൽ പങ്കാളിയാകാനുള്ള അവകാശങ്ങളും തിരഞ്ഞെടുപ്പുകളും അവസരങ്ങളും ലഭിക്കുന്നുവെന്ന് റിപ്പോർട്ട് എടുത്തുപറയുന്നു.

2025-ലെ ലോക ജനസംഖ്യാ റിപ്പോർട്ടിൽ അവതരിപ്പിച്ച പ്രാഥമിക കണ്ടെത്തലുകളെ അടിസ്ഥാനമാക്കിയാണ് 2026-ലെ ഡെമോഗ്രാഫിക് ഫ്യൂച്ചേഴ്സ് സർവേ തയ്യാറാക്കിയിരിക്കുന്നത്. വിവിധ രാജ്യങ്ങളിലെ ജനസംഖ്യാപരമായ മാറ്റങ്ങളെക്കുറിച്ച് കൂടുതൽ ആഴത്തിലുള്ള താരതമ്യ പഠനങ്ങൾ നടത്തുന്നതിനുള്ള ഒരു തുടക്കമായാണ് ഈ സർവേയെ യുഎൻഎഫ്പിഎ വിഭാവനം ചെയ്യുന്നത്.

(പരിഭാഷ, എഡിറ്റിംഗ്: സുരേന്ദ്രൻ കണ്ണൂർ)