ഫിഫ ലോകകപ്പിലും വില്ലനായി കടുത്ത ചൂട്;കായികരംഗത്തെ മാറ്റിമറിക്കുന്ന കാലാവസ്ഥാ വ്യതിയാനം

ഫിഫ ലോകകപ്പ് അതിന്റെ നോക്കൗട്ട് ഘട്ടങ്ങളിലേക്ക് കടക്കവെ, വടക്കേ അമേരിക്കയുടെ കിഴക്കൻ തീരത്ത് കടുത്ത ‘ഹീറ്റ് ഡോം’ (Heat dome) പ്രഭാവം ശക്തമായിരിക്കുകയാണ്. ഇത് പല ആതിഥേയ നഗരങ്ങളിലെയും അന്തരീക്ഷസ്ഥിതി, കളിക്കാർക്കും കാണികൾക്കും സ്റ്റേഡിയം ജീവനക്കാർക്കും ഒരേപോലെ അപകടകരമാംവിധം ചൂടേറിയതാക്കി മാറ്റിയെന്നാണ് ഗവേഷകർ പറയുന്നത്. ഈ ഉഷ്ണതരംഗം അതിന്റെ ഏറ്റവും തീവ്രമായ അവസ്ഥയിലെത്താൻ കാരണം കാലാവസ്ഥാ വ്യതിയാനമാണെന്നും, ഇതിനുള്ള സാധ്യത കാലാവസ്ഥാ വ്യതിയാനം അഞ്ച് മടങ്ങെങ്കിലും വർധിപ്പിച്ചതായും ‘ക്ലൈമറ്റ് സെൻട്രൽ’ നടത്തിയ പുതിയ വിശകലനത്തിൽ കണ്ടെത്തി.

ഈ ടൂർണമെന്റ് ആരംഭിക്കുന്നതിന് എത്രയോ മുമ്പ് തന്നെ രൂപപ്പെട്ടുവന്ന ഒരു ആഗോള പ്രതിഭാസത്തിന്റെ ഏറ്റവും പുതിയ സൂചന മാത്രമാണിത്. ഇതിന് മുമ്പ് 1994-ൽ അമേരിക്ക ലോകകപ്പിന് ആതിഥേയത്വം വഹിച്ചപ്പോഴത്തെക്കാൾ 0.7 ഡിഗ്രി സെൽഷ്യസ് (°C) കൂടുതൽ ചൂടാണ് ഇത്തവണത്തെ ആതിഥേയ നഗരങ്ങളിൽ രേഖപ്പെടുത്തിയിട്ടുള്ളത്.

"ഹൂസ്റ്റൺ, ഡാളസ്, മിയാമി എന്നിവയുൾപ്പെടെ ഈ ആഴ്ച നടക്കുന്ന പല മത്സരങ്ങളും കടുത്ത ചൂടിലായിരിക്കും നടക്കുകയെന്നാണ് പ്രവചനം. ഇവിടങ്ങളിലെ 'വെറ്റ് ബൾബ് ഗ്ലോബ് ടെംപറേച്ചർ' (Wet bulb globe temperature) ശരീരത്തിന് സ്വയം തണുപ്പിക്കാനുള്ള ശേഷിയുടെ പരിധിക്കപ്പുറത്തേക്ക് ഉയരുമെന്നാണ് കരുതപ്പെടുന്നത്; പ്രത്യേകിച്ച് തുടർച്ചയായി കഠിനമായ ശാരീരിക അധ്വാനത്തിൽ ഏർപ്പെടുന്ന കളിക്കാർക്ക് ഇത് വലിയ വെല്ലുവിളിയാകും," പരിസ്ഥിതി സംഘടനയായ 'ദി നേച്ചർ കൺസർവൻസി'യിലെ ഉഷ്ണതരംഗ വിദഗ്ധനായ ലൂക്ക് പാർസൺസ് പറഞ്ഞു.

താപനില, അന്തരീക്ഷ ഈർപ്പം (ഹ്യുമിഡിറ്റി), വികിരണ താപം (റേഡിയന്റ് ഹീറ്റ്), കാറ്റിന്റെ വേഗത എന്നിവ സംയോജിപ്പിച്ച് താപാഘാതത്തിന്റെ (Heat stress) തീവ്രത അളക്കുന്ന രീതിയാണ് 'വെറ്റ് ബൾബ് ഗ്ലോബ് ടെംപറേച്ചർ'. ശാരീരിക അധ്വാന വേളകളിൽ മനുഷ്യശരീരത്തിന് എത്രത്തോളം ആയാസമുണ്ടാകുന്നു എന്ന് വിലയിരുത്താനാണ് ഇത് പ്രധാനമായും ഉപയോഗിക്കുന്നത്.

ഉയരുന്ന താപനില എല്ലാത്തരം ഔട്ട്ഡോർ കായിക ഇനങ്ങളെയും മനുഷ്യശരീരത്തിന് താങ്ങാനാകുന്ന ശാരീരിക പരിധികൾക്ക് അരികിലേക്ക് എത്തിച്ചിരിക്കുകയാണ്. ഇത് പ്രമുഖ കായിക മത്സരങ്ങളും ലീഗുകളും നിയന്ത്രണ സമിതികളും തങ്ങളുടെ മത്സരങ്ങൾ എപ്പോൾ, എവിടെ, എങ്ങനെ സുരക്ഷിതമായി നടത്തണം എന്നതിനെക്കുറിച്ച് പുനർചിന്തനം നടത്താൻ നിർബന്ധിതരാക്കുന്നു.

ഈ ഭീഷണി കളിക്കളത്തിൽ മാത്രം ഒതുങ്ങുന്നതല്ല. പകൽസമയത്തെ മത്സരങ്ങൾ, നീണ്ട ക്യൂവുകൾ, സ്റ്റേഡിയങ്ങളിലേക്കുള്ള യാത്രകൾ എന്നിവ കാരണം കാണികൾ, സ്റ്റേഡിയം ജീവനക്കാർ, സുരക്ഷാ ഉദ്യോഗസ്ഥർ, മാധ്യമപ്രവർത്തകർ എന്നിവരും കടുത്ത ചൂടിന്റെ പിടിയിലാണ്.

"കാണികളെ സംബന്ധിച്ചിടത്തോളം, ഈ ഉയർന്ന താപനില കാരണം ഉണ്ടാകുന്ന ആരോഗ്യപ്രശ്നങ്ങൾ സ്റ്റേഡിയത്തിന്റെ കവാടത്തിൽ അവസാനിക്കുന്നില്ല. വേദികളിലേക്ക് പോകുന്നതും വരുന്നതും, വരികളിൽ കാത്തുനിൽക്കുന്നതും, തുറന്ന വെയിലിൽ ഒത്തുകൂടുന്നതുമെല്ലാം ഗാലറിയിലിരിക്കുന്ന അത്രതന്നെ അപകടകരമാണ്. പുറത്ത് വെയിലിൽ തുടർച്ചയായി സജീവമായിരിക്കുന്നത് അസ്വസ്ഥത ഉണ്ടാക്കുന്ന ചൂട് മാത്രമല്ല സമ്മാനിക്കുന്നത് - അത് തികച്ചും അപകടകരമായ അവസ്ഥയാണ്," പാർസൺസ് കൂട്ടിച്ചേർത്തു.

ലോകകപ്പ് ആതിഥേയ നഗരങ്ങളിൽ കടുത്ത ചൂട്

കാലാവസ്ഥാ വാർത്താ സംഘടനയായ ‘ക്ലൈമറ്റ് സെൻട്രൽ’ നേരത്തെ നടത്തിയ മറ്റൊരു വിശകലനത്തിൽ, ആകെയുള്ള 104 മത്സരങ്ങളിൽ 97 എണ്ണത്തിലും 28 ഡിഗ്രി സെൽഷ്യസിനും മുകളിൽ ‘കളിക്കാരുടെ പ്രകടനത്തെ ബാധിക്കുന്ന കടുത്ത ചൂട്’ (Performance-impairing heat) ഉണ്ടാകാൻ വലിയ സാധ്യതയുണ്ടെന്ന് കണ്ടെത്തിയിരുന്നു. അതായത്, മൊത്തം മത്സരങ്ങളുടെ പകുതിയോളം എണ്ണത്തിലും ഇത്തരം പ്രതികൂല കാലാവസ്ഥ ഉണ്ടാകാനുള്ള സാധ്യത കുറഞ്ഞത് 50 ശതമാനമെങ്കിലുമാണ്.

ഈ വാരാന്ത്യത്തിലുണ്ടായ കടുത്ത ‘ഹീറ്റ് ഡോം’ പ്രഭാവം ആ മുന്നറിയിപ്പ് അക്ഷരംപ്രതി ശരിവെക്കുന്നതായിരുന്നു. ടൂർണമെന്റിന്റെ നോക്കൗട്ട് ഘട്ട മത്സരങ്ങൾക്ക് വേദിയാകുന്ന പല നഗരങ്ങളും, ഗവേഷകർ നേരത്തെ ഭയപ്പെട്ടിരുന്ന അതേ കടുത്ത സാഹചര്യങ്ങളിലൂടെയാണ് ഇപ്പോൾ കടന്നുപോകുന്നത്.

"ഇന്ന് ലോകത്ത് ഉണ്ടാകുന്ന ഓരോ ഉഷ്ണതരംഗത്തിന്റെയും തീവ്രതയും സാധ്യതയും വർധിച്ചത് കാലാവസ്ഥാ വ്യതിയാനം മൂലമാണെന്ന് ഇപ്പോൾ നമുക്ക് വളരെ ആത്മവിശ്വാസത്തോടെ പറയാൻ കഴിയും. ഉഷ്ണതരംഗങ്ങളുടെ കാര്യത്തിൽ കാലാവസ്ഥാ വ്യതിയാനം കളിയാകെ മാറ്റിമറിക്കുന്ന (Game changer) ഒരു പ്രധാന ഘടകമാണെന്നതിൽ യാതൊരു സംശയവുമില്ല," വേൾഡ് വെതർ ആട്രിബ്യൂഷനിലെ ഫ്രെഡി ഓട്ടോ പറഞ്ഞു.

ടൊറന്റോ, മിയാമി, ഫിലാഡൽഫിയ എന്നിവയുൾപ്പെടെ എയർ കണ്ടീഷനിംഗ് (എ.സി) സംവിധാനമില്ലാത്ത സ്റ്റേഡിയങ്ങളാണ് ഈ ആഴ്ച ഏറ്റവും കഠിനമായ ചൂട് നേരിടുന്നത്. ജൂലൈ 3-ന് മിയാമിയിൽ നടക്കുന്ന അർജന്റീന-കേപ് വെർദെ മത്സരത്തിൽ 30.3 ഡിഗ്രി സെൽഷ്യസ് (86.6°F) ചൂടാണ് പ്രവചിച്ചിരിക്കുന്നത്. കാലാവസ്ഥാ വ്യതിയാനം മൂലം ഇവിടുത്തെ ഈർപ്പമുള്ള ചൂടിനുള്ള സാധ്യത പത്ത് മടങ്ങെങ്കിലും വർധിച്ചിട്ടുണ്ട്. ജൂലൈ 4-ന് ഫിലാഡൽഫിയയിൽ നടക്കുന്ന പരാഗ്വേ-ഫ്രാൻസ് മത്സരത്തിൽ താപനില 35.7 ഡിഗ്രി സെൽഷ്യസ് (96.3°F) വരെ ഉയർന്നേക്കാം - ഇത് സാധാരണ താപനിലയേക്കാൾ ഏകദേശം 5.6 ഡിഗ്രി സെൽഷ്യസ് കൂടുതലാണ്. ഇവിടെയും ഉഷ്ണതരംഗത്തിനുള്ള സാധ്യത ഏകദേശം ഏഴ് മടങ്ങായി വർധിച്ചിട്ടുണ്ട്.

ഇതിന് വിപരീതമായി, ജൂലൈ 5-ന് മെക്സിക്കോ സിറ്റിയിലും ജൂലൈ 7-ന് വാൻകൂവറിലും മത്സരിക്കുന്ന ടീമുകൾക്ക് താരതമ്യേന സുഖകരമായ കാലാവസ്ഥയാണ് ലഭിക്കുന്നത്. അതിനാൽ, എയർ കണ്ടീഷൻ ചെയ്ത ചുരുക്കം ചില സ്റ്റേഡിയങ്ങളിൽ കളിക്കുന്ന ടീമുകളെ അപേക്ഷിച്ച്, തുറന്ന സ്റ്റേഡിയങ്ങളിൽ കളിക്കേണ്ടി വരുന്ന ടീമുകൾക്ക് മത്സരങ്ങളിൽ ഇതൊരു വലിയ ദോഷമായി (Competitive disadvantage) മാറുന്നുണ്ടെന്നാണ് നിരീക്ഷകർ വിലയിരുത്തുന്നത്.

മാറിച്ചിന്തിക്കാൻ നിർബന്ധിതരായി കായികലോകം

കാലാവസ്ഥാ ശാസ്ത്രജ്ഞരും സ്പോർട്സ് ഫിസിയോളജിസ്റ്റുകളും വിവിധ കായിക ഇനങ്ങളിലും ഭൂഖണ്ഡങ്ങളിലും ഉടനീളമുള്ള പ്രമുഖ കായിക മത്സരങ്ങളിൽ ചൂട് ഉണ്ടാക്കുന്ന ആഘാതങ്ങളെക്കുറിച്ച് കൃത്യമായ വിവരങ്ങൾ ശേഖരിച്ചുവരികയാണ്. 2026-ലെ ഓസ്‌ട്രേലിയൻ ഓപ്പൺ ടെന്നീസ് ടൂർണമെന്റിൽ താപനില 40 ഡിഗ്രി സെൽഷ്യസിനോട് അടുത്തപ്പോൾ ടൂർണമെന്റിന്റെ 'എക്‌സ്ട്രീം-ഹീറ്റ് പോളിസി' (അതിശക്തമായ ചൂട് നേരിടാനുള്ള നയം) നടപ്പിലാക്കേണ്ടി വന്നു. ഇതേത്തുടർന്ന് പുറത്തെ കോർട്ടുകളിലെ മത്സരങ്ങൾ താൽക്കാലികമായി നിർത്തിവെക്കുകയും മേൽക്കൂരയുള്ള ഇൻഡോർ സ്റ്റേഡിയങ്ങളിലേക്ക് മത്സരങ്ങൾ മാറ്റുകയും ചെയ്തു.

കടുത്ത ചൂട് കാരണം 2014-ലും പിന്നീട് 2018-ലും ഓസ്‌ട്രേലിയൻ ഓപ്പൺ ടെന്നീസ് താരങ്ങൾ കളിക്കളത്തിൽ കുഴഞ്ഞുവീണ സാഹചര്യം ഉണ്ടായതായി സിഡ്‌നി സർവകലാശാലയിലെ ഹീറ്റ് ആൻഡ് ഹെൽത്ത് പ്രൊഫസറായ ഒല്ലി ജേ ചൂണ്ടിക്കാണിക്കുന്നു. ടോക്കിയോ ഒളിമ്പിക്‌സിലെ കുതിരസവാരി (ഇക്വസ്ട്രിയൻ) മത്സരങ്ങൾ ചൂട് കുറഞ്ഞ വൈകുന്നേരങ്ങളിലേക്ക് മാറ്റാൻ പ്രേരിപ്പിച്ചതും, ഫുട്ബോൾ ടൂർണമെന്റുകളിൽ ഉടനീളം ഹൈഡ്രേഷൻ ബ്രേക്കുകൾ (വെള്ളം കുടിക്കാനുള്ള ഇടവേളകൾ) ഏർപ്പെടുത്താൻ ആവർത്തിച്ച് നിർബന്ധിതമാക്കുന്നതും ഈ ഉഷ്ണതരംഗം തന്നെയാണ്.

ഇതിനിടയിൽ, മുതിർന്ന കളിക്കാർക്കും കൗമാരക്കാരായ കളിക്കാർക്കുമായി പ്രത്യേകം കാൽക്കുലേറ്ററുകൾ ഉൾപ്പെടുത്തിയ ഒരു സവിശേഷ 'ഹീറ്റ് സ്ട്രെസ് ഇൻഡക്സ്' (താപാഘാത സൂചിക) ക്രിക്കറ്റ് ഓസ്‌ട്രേലിയ ഇപ്പോൾ പിന്തുടരുന്നുണ്ട്. സമാനമായി, ഓസ്‌ട്രേലിയയിലെ നാഷണൽ റഗ്ബി ലീഗും തങ്ങളുടെ സ്വന്തം ഹീറ്റ് സ്ട്രെസ് ടൂളിന്റെ നിർദ്ദേശങ്ങൾക്കനുസരിച്ച് ഹാഫ്-ടൈം ബ്രേക്കുകളുടെ (ഇടവേളകളുടെ) സമയം നീട്ടി നൽകുന്ന രീതി നടപ്പിലാക്കിയിട്ടുണ്ട്.

(പരിഭാഷ, എഡിറ്റിംഗ് സുരേന്ദ്രൻ കണ്ണൂർ)